Al è jessût il singul di Scuor “Fino al Sunshine”

Mai molâ! Cjalâ denant incuintri a dutis lis dificoltâts
“… E questa notte voglio ballare all’ombra della luna piena fino al sunshine…”
◆ Spirt e cuarp a balin scoltant il ritornel de cjançon “Fino al Sunshine”, il gnûf singul dal cjantautôr furlan Scuor, jessût su lis plateformis digjitâls ai 4 di Jugn.
◆ «In chescj mês o sin stâts ducj metûts denant di alc di teribil, che nus à sconvolts, tacant des nestris usancis di vite. Alc che nus à obleâts a disprivâsi di chei piçui plasês di ogni dì. Cussì, tra i mûrs di cjase, o soi lât indenant a scrivi e a cjantâ parcè che o crôt che cumò plui che mai la musiche no puedi fermâsi, ancje se i concierts no si puedin fâ dal vîf».
◆ Giovanni Scuor al è un zovin compositôr furlan nassût tal 1993. Ghitarist fin di frut, dopo vê maduride la sô esperience musicâl sunant cun grups tant che Eden, Camera24, Full of Empty e Aritmia, al à publicât tal Dicembar 2019 “Noi combattenti”, il so prin album di solist e cjantautôr.
◆ “Fino al Sunshine”, pensât, scrit, cjantât e sunât al è stât produsût a cjase dal artist dilunc di chest periodi di solitudin leade ae pandemie. Leonardo Duriavig lu à metût dongje e daspò i mix a son stâts fats di Francesco Blasig al East Land recording studio.
◆ La cjançon, dai tons vintage e suns dal mâr, e je un toc legri, che ti fâs balâ de prime note ae ultime. Il test al conte di un insium di Vierte, la voie di lâ fûr, la necessitât di imagjinâsi intun puest diviers e miôr. Un puest cul soreli, un lûc di confuart e di ligrie dulà podêsi parâ cuant che lis zornadis a son monotonis e avilentis. Il desideri di no fermâsi e di dâ une sburtade par continuâ la vite lant cuintri di ogni dificoltât al è ce che al rint il toc une metafore di sperance. No viodìn la ore di scoltâ Scuor dal vîf par balâ e cjantâ cun lui.
◆ Stait daûr al artist e aes sôs aventuris su lis plateformis musicâls e social tant che Facebook @scuorartist. Par informazions o podês contatâ Giovanni ae sô mail: scuor.giovanni@gmail.com ❚