Carniarmonie: un Istât di musiche inte purece de mont

Chest an si conte la edizion numar vincjenûf dal festival de musiche in mont che al cjape dentri Cjargne, Val Cjanâl e Cjanâl dal Fier. E ancje se fin sul ultin ducj i apassionâts di Carniarmonie, un public che no si conte par tant che al è, dal Friûl, de Italie e dal forest, a pensavin che cheste edizion no si fasès par vie dal pericul di infezion di coronavirus, la biele gnove e je rivade e duncje ancje chest an Carniarmonie si fasarà, e si sta fasint, cun concierts che a son scomençâts ai 18 di Lui e che a laran indevant fin ai 6 di Setembar. Carniarmonie al fâs la sorprese di rivâ a un gnûf record, in barbe  aes dificoltâts, programant une rassegne di ben cuaranteun apontaments, in vincjenûf localitâts diviersis, simpri tal rispiet des disposizions sul distanziament. I lûcs privilegjâts a restin lis bielecis naturalistichis dal paisaç e dal teritori, lis plêfs antighis, lis glesiis, lis abaziis, i museus, i palaçs, e  chest an ancje concierts tal viert, tant che in Malghe Pura, tal sît archeologjic di Zui, in Val Saisere, par une colaborazion fortunade cul festival Risonanze di Malborghet e Valbrune, stant che il festival al colabore benon ancje cul Ent Regjonâl Teatrâl par trê datis realizadis insiemi, e cul festival Anciuti dedicât al costrutôr di struments a flât di Fors Disore. Un Istât di musiche pure intes purecis de mont furlane, par un cartelon di apontaments gjenerôs, ducj a gratis, ma dome su prenotazion, lant sul sît carniarmonie.it indulà che si cjatin dutis lis informazions sui concierts, sui programs musicâi e diviersis propuestis e atrativis par vivi, mangjâ e durmî in mont, in sinergjie cu la Agjenzie regjonâl dal turisim.
◆ Une des missions di Carniarmonie e je, in plui che la valorizazion dal teritori e dai bens artistics che la Cjargne e conserve, ancje la promozion di artiscj e musiciscj furlans, sedi di interpretis di cariere ricognossude, sedi di ecelencis zovinis che a son daûr a fâsi un non in realtâts impuartantis.
◆ Tra i ospits dal Friûl e programs leâts ai nestris valôrs di furlans, o segnalìn “Jacopo Linussio e il gnûf spirt european” a Comelians, par un conciert cul fortepianist Albert Busettini e la violiste di gjambe Maddalena del Gobbo, par musichis ambientadis tal periodi dal grant mestri dal tiessût cjargnel, ai 8 di Avost. La dì dopo, in Malghe Pura, al è l’ensemble di trombis dal Friûl – Vignesie Julie, direzût di Giovanni Vello, cuntun program dedicât ae mont. Dut furlan al è l’Ensemble Variabile che al dediche un conciert a Beethoven a Prât di Resie, ai 14 di Avost, come la Accademia Arrigoni di San Vît dal Tiliment, che e sarà a Malborghet e Valbrune doi dîs dopo; il furlan The Nuvoices Gospel & More Project direzût di Rudy Fantin a Tarvis ai 19; Elsa Martin e Stefano Battaglia ai 23 tal Museu Cjargnel “Michele Gortani”, fin al Côr Fvg, ae Fvg Orchestra, par rivâ al Côr Polifonic di Rude, direzût di Fabiana Noro ai 3 di Setembar a Prât di Cjargne. ❚