Sfuei Mensîl Furlan Indipendent
Archivi de Patrie

AL CINE CUN BETE. Vie cu la Buere

Bete di Spere

Triest, milvotcent-e-cjapilu. La vite di Rossella O’Bora e va indevant come simpri, jenfri fiestis, bai e apontaments, come che si use li.
Rossella e je inamorade di Ashley, un biel fantat che però si maride cuntune altre.
Par ripic, Rossella si maride cuntun altri ancje jê. Rhett, un om di Udin, al prove a bussâle, ma jê i dîs di no.
A Triest, dutis lis fameis plui plenis di bêçs a doprin i sclâfs par fâ dut: sclâfs par viodi de cjase, sclâfs par lavorâ la tiere, sclâfs par fâsi puartâ lis borsis lant al mâr. Ai udinês, invezit, no ur sta ben di jessi “parons” di cualchidun: cuant che al è un lavôr di fâ, miôr fâlu di bessôi. E propit par une cuistion di sclavitût, e sclope une vuere jenfri Udin e Triest.
L’om di Rossella al mûr in vuere, e intant, par fâle stâ al sigûr, la mari di Rossella le mande a stâ li di une agne che e vîf vie pai Cuei.
Li, Rossella e impare a lavorâ cu la tiere e cu la ue, e discuvierç che i sclâfs no i coventin, parcè che lavorâ i plâs! (Si ben che e jere nassude a Triest, Rossella e jere furlane, lu varês capît).
Ma, par colpe di un pignarûl vignût mâl, il paîs dulà che e stave Rossella al cjape fûc. Rossella O’Bora e rive a scjampâ judade di Rhett, un om di Udin, e e torne jù a Triest, dulà che e cjate dut brusât e butât jù.
I udinês, di fat, a àn doprade une strategjie di vuere gnove: a àn distrut Barcola, lassant i triestins ducj confusionâts. Cence Barcola, i triestins a àn pierdudis dutis lis motivazions (“e ce fasìno, dopo finide la vuere, se no podìn lâ a cjapâ soreli?”), e cussì i udinês a son rivâts a vinci la vuere.
Rossella no si fâs butâ jù: cumò e à imparât che no i coventin i sclâfs. E comede la sô cjase, si cjape un toc di tiere e e fâs l’ort.
Ancje Ashley al è tornât a Triest. La sô femine e je muarte, ma lui no vûl metisi cun Rossella: “Tu âs masse morbin di lavorâ!”.
Rossella e capìs che il so om al è Rhett, l’udinês. Rhett però si è rot di stâi daûr a jê: “Ce mi freial a mi… Cumò o voi a viodimi une partide dal Udin”. E al va vie.
Ma Rossella no si fâs butâ jù. E sa che e rivarà a concuistâlu cuntun bon plat di frico. Doman. “Sì, Doman. Doman e je une altre dì di vore”.
FIN ❚
Bete di Spere

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +