Sfuei Mensîl Furlan Indipendent
Archivi de Patrie

AI 32 DI MAI. Une gnot di Champions

Bete di Spere

Je vin fate: o sin in Champions! E jo o jeri li, naturalmentri. Mi soi cjapade une dì di feriis, o ai saludade Rome e o soi vignude sù in Patrie.
A pene rivade, il stadi Friûl mi à ricevût cuntune sorprese par fâmi sintî a cjase: la ploie. Che par fortune e je durade pôc: che sere li, l’Udin al veve voie di dimostrâ di jessi compagn di une “grande” scuadre. E di fat, come che al sucêt cu lis “grandis”, il parcament al jere plen, lis machinis a jerin metudis une parsore di chê altre e par jentrâ e jere une file lungje come il “passio”. In sumis: mi someave di jessi ancjemò a Rome. Dome che tor ator o viodevi masse int in ros e neri (ma no lu àno ancjemò capît i furlans che no deventin plui bulos tifant par cualchidun altri?).
Par lâ in Champions, al Udin i bastave une paritât. E savint che al furlan no dan sodisfazion lis robis facilis, l’Udin al à propite impatât, cussì i trente mil che a jemplavin il stadi a àn podût patî fin al novantesim. Ancje Di Natale, che al sarà ancje napoletan ma aromai al è plui furlan di noaltris, à capît dut e al à sbaliât il rigôr di pueste.
Ma ae fin, je vin fate: cuntun voli al maxischermi (che ancjemò mi somee strani, a viodilu, dopo tancj agns: ma alore si impiave!) par viodi ce che e faseve la Lazio, un voli tal cjamp e un voli a l’orloi (cuant che al scuen, un furlan si fâs cressi ancje cualchi voli in plui), o sin rivâts insom: l’arbitri al à sivilât trê voltis e l’Udin al è jentrât in Champions. Anzit, tai preliminârs. Ma ancje chel lu àn fat di pueste: il furlan al è discret, al jentre simpri in ponte di pîts in cjase di chei altris. E cussì e je scomençade la fieste, vie pes stradis cui pivets a manete o ae maniere furlane: mangjant e bevint fûr dal stadi, saludant i zuiadôrs che a jessivin dal parcament e berghelant ancje cun chês altris machinis che a passavin. A ‘nd è passade ancje une targade Triest: noaltris o jerin li a cjantâ “chi non salta è triestino”, e chel che al vuidave al cjantave ancje lui… No soi rivade a capî se e jere une machine di seconde man o se al stave nome cirint di mimetizâsi.
Ma la fieste plui grande e je stade prime, dentri tal stadi Friûl, dopo la partide. E no je stade cuant che i zuiadôrs a àn fat il zîr dal cjamp, e nancje cuant che a àn sbarât i curiandui o i fûcs artificiâi. No, la fieste plui grande e je stade cuant che Pozzo al à dit: «L’an cu ven, us vûl al stadi in vincj mil. Ancje gratis». Propite cussì, al à dite: “ancje gratis”. No ai sintût une ovazion dal gjenar al stadi nancje cuant che Bierhoff à segnât cuintri l’Ajax.
BETE DI SPERE

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +