Ai 31 di Mai e je finide la Vierte meteorologjiche

Ai 31 di Mai e je finide la Vierte Meteorologjiche, che e lave indenant dal prin di Març. Par convenzion, lis stagjons meteorologjichis a tachin cul prin dal mês che al cjape dentri l’ecuinozi o il solstizi e a condurin trê mês. Lis stagjons astronomichis, invezit, a tachin e a finissin propit cui ecuinozis o i solstizis.
◆ Contrari dal an passât, il mês di Març al è stât une vore sec, cu la ecezion de zone di Barcis. Lis temperaduris a son stadis cjaldis: lis mediis in planure a son stadis jenfri i 10°C e i 11°C, un grât plui altis rispiet ae medie dai ultins dîs agns e 2°C plui altis dal trenteni 1991-2020, cuntun andament che lis à viodudis 1,5°C-2°C plui altis de norme tai prins dîs dîs, di 2°C-2,5°C intai seconts dîs dîs, ma sot de medie intai ultins dîs dîs. Ancje il mâr al è stât cetant cjalt inte prime metât dal mês, avonde in linie cul storic te seconde part. Clâr che in cheste suaze i events perturbâts no son stâts ni tancj ni fuarts: si à vude variabilitât jenfri i 11 e i 16 dal mês, cun cualchi burlaç e tampieste piçule, prin su la cueste, daspò ancje in mont, cun neveadis fin a 900m in Cjargne, fintremai 30/40cm parsore dai 1500m. Ancje inte gnot jenfri i 25 e i 26 al à neveât jù fin a 600m e lis temperaduris si son sbassadis di dîs grâts. Dut câs, la nêf ingrumade par tiere e reste scjarse.
◆ Ancje il mês di Avrîl al è stât sec, cun ciertis zonis in deficit di ploie ancje dal 80%. Lis temperaduris mediis a son stadis di 14/15°C in planure, ven a stâi cirche 2°C plui altis sedi rispiet ai ultins dîs agns che al 1991-2020. Il massim de anomalie termiche intes temperaduris mediis si à vût inte fasse centrâl dal mês; i ultins dîs dîs, invezit, a son stâts plui dongje de norme. Vie pal mês si son dadis la volte l’anticiclon des Azoris, sec e cjalt (ma no tant che l’anticiclon african), zornadis di buere (aiars fuarts di Nord Est si son regjistrâts a Udin, Gardiscje e Triest; frecuencis anomalis di aiar di Nord Est a San Vît dal Tiliment e Udin), un moment perturbât ai 14 di Avrîl, plovisine e burlaçs di calôr jenfri i 15 e i 17, un passaç frontâl jenfri sabide 18 e domenie 19.
◆ Il mês di Mai, preâ Signôr, al à fermât il sec: dai 5 ai 21 dal mês al à plovût e neveât (fin ai mil metris ai 15 di Mai) e burlaçs si son viodûts ancje la ultime dì. Inta chês altris zornadis al à dominât l’anticiclon. Dut câs, ancje se lis ploiis coladis su dut il Friûl a son inte norme, no je cussì la lôr distribuzion: il Friûl di jevât al à vût ploie superiôr dal 10-70% de medie, chel di amont dal 10-40% plui basse. I prins dîs dîs dal mês a son stâts di 1°C plui cjalts rispiet al trenteni di riferiment, i seconts dîs dîs 2°C plui frêts, cun records negatîfs des temperaduris mediis pai ultins dîs agns, i ultins dîs dîs a àn vût temperaduris mediis di 5°C plui cjaldis rispiet ae climatologjie. Ai 11 di Mai la cumbinazion di une depression su la Europe Centrâl e un Mâr Adriatic cjalt e à fat soflâ sul Friûl aiar cjalt e umit di garbin; daspò, di soreli a mont al è rivât aiar frêt in cuote: cundizions perfetis pe nassite di burlaçs, ancje di nature supercelâr. Dopomisdì une supercele e à puartât tampieste di 2-3 centimetris a Bertiûl e Listize, di 5cm a Rosacis. Une altre e à fat nassi une codebuie a Durlasse (comun di Rivignan Teôr). Sore sere e ancjemò tampieste a Prissinins, Çarvignan e in Bisiacarie. Une codebuie plui fuarte e je stade a Bibion. La buinore dopo, tampieste sul Friûl a bonât.
◆ Duncje une Vierte che e à vût moments plui invernâi e plui estîfs, ancje se segnade dal cambiament climatic par vie di temperaduris plui altis rispiet aes mediis storichis. ❚