Gianni Colledani, nassût a Clausêt tal 1946, al vîf a Spilimberc. Dopo i studis classics e la lauree al è stât insegnant di letaris e par 28 agns diretôr de Cjase dal Student di Spilimberc. Al dirêç Il Barbacian, la riviste culturâl de Pro Spilimberc, e al è president de Universitât de Tierce Etât dal Spilimberghês. Studiôs di storie medievâl, linguistiche, etnografie e storie locâl, al à publicât numerôs saçs e articui. Al insegne lenghe e culture furlane tai cors de Societât Filologjiche Furlane.
_
Gianni, in ce ambient sêstu vignût sù?
O ven di Clausêt, o soi un asín: gno pari al è di Clausêt e mê mari di Cjastelgnûf. Tal 1953 si sin trasferîts a Spilimberc. Lis scuelis elementârs e lis mediis lis ai fatis a Spilimberc. In famee o fevelavin furlan, naturalmentri te variante clausetane, e il talian lu ai imparât a scuele, come seconde lenghe, cjapant ogni tant cualchi bachetade, come che al sucedeve in chei timps. In cuarte e in cuinte o ai vût un mestri “iluminât”, pense, che ogni tant al acetave cualchi peraule furlane, soredut se e veve a ce fâ cu la agriculture, ma simpri metude fra virgulutis!
_
E lis superiôrs dulà lis âstu fatis?
O ai fat il Liceu classic tal “Stellini”, dulà che o ai cjatât une professore che mi tontonave parcè che cualchi volte o dopravi il furlan, e ae fin mi mandà adiriture dal preside. Par fortune, chel preside al jere Alessandro Vigevani, grant furlanist. Mi disè che chê professore e veve «une mentalitât di altris timps», e po dopo al diseve: «O sin ancjemò sclâfs di Triest». Su Triest al faseve simpri une batude: «E vignarà ben une dì che TS e sarà la targhe di Trasaghis». Vigevani mi cjapà in simpatie e mi puartà te Societât Filologjiche Furlane, che cun chê o voi indenant a colaborâ di chê volte.
_
E cuant ti ise vignude une cussience plui madure che il furlan al è un popul e il furlan une lenghe?
Tai timps des superiôrs a Udin. Cuant che o jeri a Spilimberc no vevi mai pensât a chestis robis; ma intun ambient plui “italocentric” come chel de citât, chê cussience e je saltade fûr. Al jere il timp des rivendicazions studentescjis. Une robe che mi consolave e jere che, cuant che o fasevin i corteus e o passavin denant de Filologjiche Furlane, al jere simpri un standart cun scrit «Fuarce Friûl». E po dopo un altri grant fatôr di cussience al è che a jerin lis bataiis par otignî la Universitât furlane.
_
Tu tu sês studiôs e apassionât di storie: cui sono stâts par te i mestris di cheste materie?
Cuant che o jeri zovin, Tito Menis. Po mi veve plasût une vore I senza storia di Tito Maniacco, che al veve une vision de storie viodude di un altri pont di viste. Cuant che o ai studiât a Triest o soi stât arlêf di Gaetano Perusini. Po o vuei nomenâ Giampaolo Gri, Giovanni Frau, e o ai vût la fortune di cognossi Gianfranco Ellero, de sô amicizie mi sint ancjemò onorât. No dismenteìn che achì a Spilimberc e viveve Novella Cantarutti: le frecuentavi e mi conseave tantis leturis di fâ. In dì di vuê o stoi daûr cun plasê al lavôr di Agnul Floramo, Walter Tomada e Diego Navarria.
Cuasi mi dismenteavi che tes superiôrs o ai vût pre Checo Placerean: un professôr che, intant des sôs lezions, tu ti auguravis che la campanele no sunàs mai, tant che ti incjantave. La prime volte che o ai sintût fevelâ sul seri dai Langobarts e je stade propit di lui. Al è stât di li che mi soi dedicât a studiâ la storie e la lenghe di chel popul.
_
E tal cjamp de leterature, cui ti isal plasût lei par furlan?
In fin dai fats, pre Toni Beline, cu la sô scriture fine, sauride e profonde. In dì di vuê mi plâs la rubriche di Serena Fogolini sul vuestri sfuei: Peraulis tal cjast. Tal cjamp leterari e culturâl, però, o varès voie di vierzi une parentesi dute particolâr su Aldo Colonnello, che plui che autôr al è stât un agregadôr grandonon, organizadôr e motôr di iniziativis e publicazions. Dut ce che al è vignût fûr dal Circul Culturâl Menocchio al è materiâl di lei, di supâ e di gjoldi. E al rivave a fâ deventâ nobilis robis di paîs che dopo a cjapavin un valôr universâl.
_
Tu cemût ti definiressistu: furlanist, autonomist, indipendentist…?
No voi daûr di masse rafinaduris ideologjichis: mi definìs furlanist, un grant inamorât dal Friûl. E par me e finìs li.
_
E ce aspirazions varessistu pal Friûl, ancje utopichis?
Che il Friûl al vedi une sô autonomie, in armonie cui popui che nus stan ator, come i Slâfs o i Ladins, rispietant la sô anime e la sô identitât. I auguri di no vê pôre di vê coraç. Cuant che tu âs une tô autonomie tu puedis decidi di bessôl, simpri tal plen rispiet des diferencis che a son, ancje achì di nô. Se Donald Trump al ves vût let il mot dal Grant Sigjîl dai Stâts Unîts, nol varès ostegjât i migrants: E pluribus unum, «di tancj popui, un popul sôl».
_
Mi fâstu il non di cualchi personaç che al à savût tignî alte la bandiere furlane idealmentri?
O ai cognossût, ancje se par pôc timp, Fausto Schiavi. Po mi plaseve une vore il pinsîr di Silvana Fachin Schiavi. No pues dismenteâ Arnaldo Baracetti. Po o fevelavin di Vigevani; o pues nomenâ ancje Tessitori… Disìn che a son stâts tancj che a àn sburtât indevant la idee di une identitât furlane. No je la fature di un di bessôl che al tire indevant il cjar, un popul al ven sù cun ducj insiemi. E sperìn che al sedi simpri cualchidun di gnûf a puartâ alte cheste bandiere.
_
O sai che par te la toponomastiche e je une materie impuartante: cui sono studiôs impuartants?
I toponims a son i testemonis des pieris miliârs de nestre storie: là che al sucêt un fat impuartant, chest al reste fissât intun lûc midiant dal so non. Godie, Gôt di Glemone, vie pe Italie Goito: ducj a fevelin dai Gôts. Sármede e ricuarde i Sarmatics. O ben Cordenons, dividût tai cuartîrs di Romans e Sclavons. Ducj popui che no si varès di clamâ «barbars», ma migrants, che a àn contribuît a fâ il Friûl. Se o lais tal Museu di Aquilee, o viodês epigrafis di int vignude de Sirie, dal Liban, dal Nord Afriche: a ricuardin la lôr divignince, ma ducj a àn vivût e a son muarts tal Friûl. Cheste e je une lezion che o vin di tignî a ments ancje pal dì di vuê. O finìs citant une frase di Pier Carlo Begotti: «I toponims a san une vore di plui di nô di cuant che nô o savìn di lôr».
_
Mi fâstu cualchi non di mestri di piture furlane?
Marco Tiussi, tal cjamp antîc: al jere dal Cinccent e di Spilimberc. Tra i modernis, Toffolo Anzil mi pâr un biel pitôr. Po dopo Umberto Martina, un dai plui impuartants artiscj furlans de prime metât dal Nûfcent, e Ugo Canci Magnano, neorealist dai agns Vincj, che lis sôs oparis a jerin centradis su la civiltât contadine.
__
Ultime domande: un personaç o une opare che par te e varès di jessi valutade di plui.
Jo o segnalarès une robe che mi fasarès tant plasê viodi ristampade: la Cronaca de’ suoi tempi di Roberto di Spilimbergo (1480-1541). Dissendent de famee dai nobii di Spilimberc, e conte i fats dai prins agns dal Cinccent tal Friûl. E regjistre cun fedeltât i fats de vite di provincie, ufrint un cuadri unic su la mentalitât, lis crodincis e la justizie di chei timps. Mi plasarès che e fos doprade a scuele e che chestis vicendis a fossin confrontadis cun ce che al sucêt vuê, domandantsi: «Ce isal cambiât?». Il test al è scrit intun miscliç di latin, talian, venit e furlan di chei timps. ❚
FOCUS. Il personaç
Alessandro Vigevani (Florence, 1914 – Udin, 2005).
Nassût a Florence ai 15 di Setembar dal 1914, al calcolà simpri il Friûl come la sô patrie di elezion. Daspò il diplome tal liceu “Stellini” di Udin (1932), al studià te Scuele Normâl di Pise, laureantsi in Letaris tal 1936. Tal 1939 al otignì ancje la lauree in Jurisprudence a Padue. A nome vincjesîs agns al deventà il plui zovin soci de Academie di Siencis, Letaris e Arts di Udin.
Tai agns Cuarante al fo assegnât ai Istitûts talians di culture di Helsinki e Zagabrie, dulà che al aprofondì la lenghe e la culture cravuate. Arestât tal 1944 cu la acuse di colaborâ cui partesans jugoslâfs, al fo liberât gracie dal intervent de Nunziature apostoliche. Tal dopovuere al insegnà tal Liceu “Stellini” e si dedicà ae riflession su la autonomie furlane. Tal 1946 al publicà Il Friuli oggi, opare fondamentâl su la identitât storiche, linguistiche e politiche de regjon.
Tra i principâi esponents dal Moviment popolâr furlan, al sostignì la ricostituzion dal Friûl tai siei confins storics, distint dal Venit e de Vignesie Julie, e il ricognossiment di une autonomie speciâl. Tai agns seguitîfs al alternà incarghis tai Istitûts talians di culture europeans cu la direzion dai liceus classics di Gurize e Udin.
Al publicà monografiis impuartantis su Pauli Diacun, Berengari I e altris protagoniscj de storie furlane. Al coltivà un interès vîf pe storie dai Alpins e dal Udin di balon, che i dedicà doi volums – un scrit cun Gianni Brera – proponint une leture antropologjiche dal balon. Infin al voltà Le vite dei dodici Cesari di Svetoni pe Longanesi. ❚
