AGRICOLTURE. Sec masse sec

Al è dal mês di Dicembar che nol plûf: pal amôr di Diu, o stin gjoldint zornadis bielononis, plenis di soreli e di cjalt. O vin un anticip di primevere che no vedevin di pardabon tant timp.
Però… però o vin un probleme: nol è che o podìn vê simpri zornadis plenis di soreli e di cjalt, par biel che al sedi. Un tic di ploie no larès mâl! Dopo, e je vere, nô furlans o sin simpri bogns di lamentâsi: e se al plûf parcè che al plûf, e se al è soreli parcè che al è soreli… no sin mai contents!
Ciert al è che il sut al pues puartâ cualchi probleme, soredut pe agriculture. Cemût si compuartial il timp in dì di vuê? E ce nassial di chest cambiament? O vin fat une cjacarade cun Enos Costantini, storic e responsabil editoriâl de riviste Tiere Furlane.
Ce staial sucedint al clime dal dì di vuê?
O podìn ben dî che il timp al sta cambiant, no je une novitât, lu vedìn e lu leìn dapardut. Cumò, par dî la veretât, o sin intun periodi che al plûf pôc, ma al podarès sucedi che di chi a cuindis dîs al ven fûr un temporalon e al plûf par un mês. Ce che al è sigûr, al è che il timp intai ultins agns al è cambiât, e al è plui cjalt e par plui timp.
Cemût ise la situazion in Friûl?
Intai ultins dîs agns il clime al è cambiât ancje in Friûl: prime o vevin une grande cuantitât di ploie che e jere distribuide intal cors dal an. Cumò, al sucêt simpri plui dispès che o vin sîs mês che al è biel e sut, e sîs mês li che al plûf, magari no simpri, ma in chel periodi e cole la stesse cuantitât di ploie che e colave prin in dut l’an. Stesse cuantitât di aghe ma in timps diferents, rispiet ai agns passâts.
Ce compuartial il sec pe agricolture?
O fevelìn di sec e di sut, e po magari o varìn il mês di Avrîl o di Jugn une vore ploiôs, cumò no podìn savêlu. Ciert al è che un periodi di sec cussì, al capite une volte ogni cuatri o cinc agns. Ma nol è il câs di stâ a vaî parsore. Par fortune achì o vin un sisteme di irigazion une vore valit, che al rive a fânus tignî buinis lis plantis, che di sigûr a son chês che a patissin di plui. In Friûl si fâs soredut blave, che e je une culture che no sufrìs tant il sec. E po o vin i vignâi, che cul cjalt e un clime sut di solit a fasin buine ue e di conseguence un bon vin. Tant par fevelâ di vin, une volte mi visi che il clime al jere diferent: cuant che o jeri zovin, si finive di vendemâ ae fin di Novembar. Cumò la vendeme e finìs simpri prin, ae fin di Avost o vin za finît!
Ma saraial simpri plui cjalt alore?
Ma, disìn che si sta lant vier un periodi li che al sarà plui cjalt, di sigûr. No soi jo a dîlu, ma flôr di climatolics e naturaliscj di dut il mont. Ce si puedial fâ, alore? Ben, cul cjalt par plui timp si puedin cambiâ lis culturis, e provâ a semenâ alc di gnûf. O rivaressin ancje a fâ vin in Cjargne. E je dut câs une cuintri indicazion: se la biele stagjon e dure plui a lunc, o rivìn a fâ plui robis, ma o varìn mancul cualitât. Chest par vie che, cence sbalç di temperadure, o vin mancul variazions e duncje un nivel di prodot plui omogjeni.
E lis bestiis?
No varessin di vê problemis. Lis nestris vacjis a stan miôr tal sut che tal umit! ■
Cinzia Collini