Sfuei Mensîl Furlan Indipendent
Archivi de Patrie

A TU PAR TU. Ce che a disaressin dal Friûl di vuê, chei che a àn fat la sô storie. I morons dal siôr Arturo

............

Scomençade cul prin numar dal 2014, ve cNô o contarìn storiis e aspiets de cuistion che la retoriche dai Stâts nazionâi no à mai contât✒ Redazion
“Insome, o vês tacât a masanâ ideis propite culì?”, o domandi al siôr Arturo, che si slisse lis moschetis cjalant in bas, dal cueston dal cjistiel, viers  chel ort li che al veve tirade sù la sô prime oficine. “Po sì. E ce tante nostalgjie. Prime dal laboratori di Bepo, gno pari. Gjeniâl. Al sperimentave lis primis lastris di fotografie. In chê volte al voleve dî impaçâsi cu la chimiche: reagjents, acits, lûs e scûr che a zuiavin insiemi par fâ vignî fûr dal nuie il miracul di une muse, la bielece di un ritrat. Se tu pensis, la ricercje sientifiche e je compagne. Tu provis, tu ciris, tu cumbinis i elements, e ae fin alc al ven fûr alc che ti incee di maravee. Simpri”. Al manten dute la ande de sô batule, chest omenut, che al à rapresentât pe citât di Udin, pal Friûl, un orgoi e une reson di braùre, ancje se no si viôt tante ricognossince ator, nancje in chest an, che e varès di jessi fiestone par ricuardâlu. Tal sens che in cualsisedi altre bande di Italie e dal mont un fi cussì al sarès ricognossût, celebrât e puartât di esempli ogni dì, no dome tal inovâl de sô nassite. Provait dome a pensâ al serp Nikola Tesla (Smiljan, 10 di Lui dal 1856 – New York, 7 di Zenâr dal 1943), coetani di Malignani: fintremai i cravuats, che a son ipernazionaliscj, massime cuintri i Serps, stant che il paisut di nassite dal sienziât si cjate in Cravuazie, ti segnalin su la autostrade cun cartei e indicazions zigantis il gjeni e la grandece di un fi che nol vignarà mai dismenteât. E chi di nô, invezit, al sucêt dut il contrari. I provi a domandâi il parcè: “Cjale mo, cheste strambetât, cheste anomalie strane e podarès jessi cjapade di esempli par une riflession, un tic amare, sul vuestri Friûl di vuê. Che mi somee un pôc pidimentât sul versant de sô memorie, di une identitât che si fonde ancje su chês feminis e chei oms che a àn contribuît a pandi il non di cheste nestre biele tiere ator pal mont. O sês simpri bogns di criticâ, di vaî, di bruntulâ: e la Italie che us dinee la autonomie, e i sorestants ignorants, e lis istituzions che a clopin. E o vês ancje reson su dut. O soi ben convint che al sedi cussì. Ma, e voaltris? Voaltris furlans, o intint. Mi somee che intai ultins timps e sedi di mode in Friûl une cierte distrazion. Une disatenzion gjenerâl. Isal mai pussibil che si visin di jessi furlans dome intes manifestazions “doc”, tai “expo” internazionâi, o intes riunions de Filologjiche?”. E, in efiets, cheste ocasion pierdude dai 150 agns de nassite di un furlan cussì impuartant mi pâr pardabon indicative di un alc, une sensibilitât che e mancje. Chest al podarès jessi stât l’an che al incoronave Udin tant che la citât de Sience, de Ricercje, dal Progrès tecnologjic. Par proponi un model che al cjale indenant cence dismenteâsi ce che o sin e ce che o sin stâts. E cussì lu stici, o sai ben che al om i plâs la polemiche, e lui al tache: “Bastarès vê un fregul di fantasie. Ce che al mancje propit in chês istituzions che a varessin di coltivâle: scuelis e universitât. Ma o crôt che intes aulis e jenfri i programs di studi al seti dut ma no il gust di discuvierzi alc di gnûf, di zuiâ cu la cognossince, cul savê. Come fieste di complean mi sarès pardabon plasût spassizâ par une citât, la mê citât, che si vante di jessi la capitâl dal Friûl, viodint frutats e ospits a zuiâ cui lambics che la nestre Universitât, la Universitât dal Friûl, e varès podût sparniçâ pardut: e sarès vignude fûr la muse di une citât de lûs e de gnove energjie, colorade e gnove, buine di contâ par furlan ancje lis concuistis plui intrigadis dal savê sientific. Che il svilup de identitât nol pues mighe limitâsi dome a la art, ae poesie, al teatri o ae leterature. Bielissimis robis, no si discor nancje, ma insome noaltris furlans o vin fat alc a pro dal mont in mil azions diferentis. Massime inte nestre ete, cussì puare di sperance, o vin di sburtâ une idee di progrès che e vedi une etichete dal dut furlane. Parcè no? Nol sarà mighe vêr che al esist dome il model Triest, cul so sincrotron cjarsulin, e il model furlan, lontan di une dimension moderne, concrete, critiche, peât dome ae civiltât contadine, o ae staiare sul breâr, no mo? Par dîle e contâle dute, o ai simpri crodût che la anime dai furlans e il lôr cjâf a fossin predisponûts a une cjarie visionarie fuarte, buine di puartâ il pinsîr a cori lontan, cjalant il mont cun voi gnûfs, magari stranîts, ma simpri plens di maravee e di curiositât”. Orpo. Une biele burascjade! E o crôt che se meretìn un pôc ducj, cheste tirade di orelis. Ma no volarès che l’incuintri cul siôr Arturo al finìs cussì, cul savôr di amarotic. “Siôr Malignani, o vês studiadis lis machinis eletrichis, progjetant une pile par dâur energjie. E lu vês fat intun daspò di misdì, cussì, par no stufâsi. E o sês ancje rivât a fâ cressi a Udin lis stelutis di mont, par zûc, lambicant i elements dal microclime! Ma ise vere che l’unic esperiment mâl riessût tal so laboratori al è stât chel di inventâsi une machinute par cuei e glassâ i marrons glacés?”. Lu cjali surian. E lui, smicjant la mê golosetât che si mostre in dut il cicin che mi involuce, al rît e come un bon filosof mi rispuint: “La bielece dai esperiments e je propite chê di provâ e tornâ a provâ fin cuant che no si rive a un bon risultât. Scriviti cheste massime suntun sfueut, imparile e pandile ai furlans, par che no si strachin mai di lotâ par realizâ ce che o sperìn. Te culture, te politiche, te vite. Se nus “rompin i morons”, o vin di fâ viodi che a ’nt vin di scorte par une altre ocasion!”. E vie nô, su pal troi dal cjistiel. Lecantsi lis moschetis al sôl pinsîr di une idee tant golose! ❚
________
Arturo Malignani (Udin, 4 di Març dal 1865 – Udin, 15 di Fevrâr dal 1939), inventôr, sienziât, esploradôr curiôs dal mont de fisiche, de astronomie, gjeologjie, meteorologjie e de tecnologjie aplicade. Ancje tant che imprenditôr al à dât un sburt impuartant al progrès de Patrie, puartant Udin a jessi la tierce citât europeane, daspò Londre e Milan, a gjoldi de iluminazion artificiâl (al jere il 1888), ma ancje a jessi servide di un tram eletric. Par fâ front ae discontinuitât de puartade dai flums de Patrie, masse plens in Autun e secs di Istât, al pensà ben ancje di inventâsi une bancje de aghe: la dighe di Crosis, tirade sù jenfri il 1897 e il 1900. E par risolvi il probleme de energjie intun paîs puar di risorsis come il nestri, al à progjetât la costruzion di centrâls termoeletrichis e ancje idroeletrichis, sfrutant in chest câs lis roiis citadinis e plui tart, fra il 1906 e il 1907, lis aghis dal flum Tor, in gracie de centrâl di Vedronze, dongje Lusevere, che e à servide la citât di Udin, lis sôs fabricutis e oficinis fintremai al Orcolat dal 1976, e che e je stade la mari de Societât Furlane di Eletricitât. Di bon furlan, tra i tancj interès di un cjâf cetant luminôs, nol podeve no ocupâsi di ciment e di cimentificis. Chest an, si celebrin i 150 agns de sô nassite. E al varès di jessi une fiestone grant, no dome chi di nô, ma ancje vie pe Italie e pe Europe. ❚ A.F.

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +