Friûlpoint, la marche storiche che e prodûs maiutis in lenghe furlane dal 1999, no si fâs fermâ dal Coronavirus e e presente la gnove colezion 2020.
◆ «O volìn dâ il nestri contribût di fiducie e positivitât par une riprese pronte » al dîs il titulâr Michele Venier «e a pene che lis buteghis a àn podût tornâ a vierzi o vin mandât fûr lis gnovis realizazions che no viodevin la ore di fâ cognossi».
◆ Cualchi anticipazion? «O ilustrarìn ogni maie a man a man: o vin voie che lis scuvierzês te buteghe, sul sît, o midiant des presentazions che o fasarìn» nus dîs Michele. «O pues dî che o vin un restyling e altris che a stan inte nestre linie consuete, ma o introdusìn cualchi novitât cuntune creazion un pôc plui ilustrade in confront dal solit. O vin volût ancje testemoneâ la sensibilitât ambientâl che e je daûr a vignî sù cuntune t-shirt intitulade Make Frico not Warming che e ricjape il sproc de nestre aromai iconiche Make Frico not War».
◆ La Friûlpoint aromai e je rivade ai vincj agns di ativitât e e à savût concuistâsi un public afezionât. Cualchidune des sôs grafichis a son deventadis pardabon mûts di dî, tant che la Make Frico not War za nomenade, che e je difondude dal 2003. Intal timp e à slargjât la ufierte ai clients cun altris propuestis tant che lis scudielis, i grumâi, i puarteclâfs, ancje un orloi di mûr. Chest ultin al è ilustrât cu lis musutis famosis che si cjatin su lis bustinis di zucar intai bars furlans, che a son gjavadis de maiute Friûlpoint Cemût sêstu vuê. Propuestis dopo ancje pai plui piçui, cun maiutis e bavarins. «O cirìn simpri di rinovâsi e di cirî stradis gnovis par rapresentâ il Friûl e i furlans, parcè che chel che nus sburte e je la grande passion par cheste tiere, che volìn valorizâ e fâ deventâ braurose di se» al siere Michêl. «Par esempli chest an – no sai se dî magari cussì no – o vin produsût ancje lis mascarutis protetivis». Cuissà se lis mascarutis in futûr a restaran un ogjet usuâl: ducj o sperìn che, se al sucedarà, a saran dome che un acessori di mode o cuntun ûs sporadic. Lis maiutis, invezit, o vin voie di viodilis simpri. ❚
Redazion
A son rivadis lis gnovis maiis Friûlpoint
Redazion