Al è scjadût di pôc il tiermin par iscrivi i propris fîs a scuele e duncje ancje par decidi se zovâsi dal insegnament de lenghe furlane. Come che e ripuarte ancje la campagne promozionâl de ARLeF “Dîs di sì al furlan a scuele par to fi”, difondude vie pal mês di Zenâr su cjarte stampade e sui social, i dâts dal 2019 a son confuartants, stant che il 76% dai gjenitôrs al à fate cheste sielte, cun sù par jù 38.000 arlêfs des scuelis de infanzie, de primarie e de secondarie di prin grât che a àn podût seguî lezions in lenghe furlane par almancul 30 oris intal an di scuele. La int, dal rest, e à tacât a cjapâ cussience dai vantaçs dal plurilinguisim e biel planc e je daûr a inacuarzisi dal valôr zontât di cierts insegnaments, che dongje dai fondaments de lenghe a puartin ancje elements di culture, gjeografie e storie dal teritori. Sino su la strade juste, inalore? Forsit, ma e coventarès une splanade par comedâ i tancj berdeis che a morestin il viaç. Se e je vere che ore corint a son plui di 1700 chei che si son notâts inte liste regjonâl dai docents cun competencis ricognossudis pal insegnament de lenghe furlane, si à però di dî che i nivei di preparazion a son une vore diferents e che no ducj a àn pardabon une cognossince suficiente de materie. Dongje di chei che a àn seguît percors formatîfs daspò de lauree e altris cors di pueste, al è ancje cui che al declare di vê esperience intal insegnament dal furlan, cence però vê mai partecipât a nancje une ore di formazion. Par fortune, intai ultins agns a son simpri plui numerosis lis ufiertis indreçadis ai docents che a vuelin insegnâ la lenghe furlane o ben che a àn voie di infuartî lis lôr cognossincis o ancje dome di tignîlis ben batudis cuntune formazion continue. Ae fin dal 2016, di fat, al è nassût Docuscuele, il Centri di documentazion, ricercje e sperimentazion didatiche pe scuele furlane, su idee de Societât Filologjiche Furlane, inte suaze di une convenzion cu la ARLeF, cul jutori de Regjon e in colaborazion cul Ufici Scolastic Regjonâl. Il Centri, in plui di jessi un pont fondamentâl di racuelte dai materiâi produsûts des (e pes) scuelis, al organize ancje cors pai insegnants, ricognossûts daûr des liniis vuide dal MIUR. Cun di plui, tacant dal an academic 2016/2017, dentri dal cors di lauree in Siencis de formazion primarie de Universitât dal Friûl, al è stât istituît ancje il curriculum pal insegnament in lenghe e culture furlane, cun chê di formâ docents cuntune preparazion specifiche par lavorâ intes scuelis de infanzie e intes classis de primarie.
Par cumò, cemût che nus conte Gabriele Zanello, professôr di Leterature furlane (obligatorie) e di Didatiche de Lenghe Furlane (a sielte), i students a son ricetîfs e a prometin ben, stant che a àn la percezion di preparâsi a jentrâ intune comunitât indulà che a podaran puartâ il lôr contribût. Jenfri i insegnaments previodûts, in plui dai doi cors za citâts, a jentrin ancje Lenghe e linguistiche furlane (obligatori, tignût dal professôr Federico Vicario, par un totâl di 49 oris, cun laboratori) e Plurilinguisim e educazion plurilengâl (facoltatîf, tignût de professore Serena Martini). No cate che la buine part di lôr e sedi za daûr a lavorâ, la frecuence e je avonde buine, ancje se no simpri i impegns ur permetin ai students di seguî ancje i laboratoris extracuricolârs (come chei proponûts l’an passât, che a àn vude une partecipazion minime). I iscrits, dut câs, a cirin di formâsi ancje frecuentant i cors organizâts di Docuscuele. Il numar – sù par jù uns cincuante di lôr (ma i corsiscj dal prin an a son inmò in timp a iscrivisi intal curriculum) – al è ancjemò scjarsut e nol baste a stropâ lis tantis busis inte domande, ma a son buinis sperancis che al incressi cul timp. Bisugnarès però creâ un puint jenfri lis esperiencis e lis professionalitâts dal passât e chês che a son daûr a saltâ fûr cumò. E mancje soredut une continuitât, che e sarès dal sigûr plui sintude se si rivàs a lâ fûr di une vision estemporanie dai progjets sul furlan, simpri considerât tant che une materie in plui (o di masse) e duncje dispès no tignût ni in cont ni di cont. Se si vûl lâ lontan, bisugne che la lenghe e jentri intun plan ordenari, cuntun ricognossiment concret di cui che al à pardabon lis competencis linguistichis. ❚