Sfuei Mensîl Furlan Indipendent
Archivi de Patrie

____________________

............

La regjie uniche che e cope il teritori

✽✽ Il 2019 al sarà l’an di Leonardo da Vinci. Ancje in Friûl-Vignesie Julie. Lu à dit la assessore regjonâl ae Culture Tiziana Gibelli. Intune interviste al Piccolo e à declarât: «O darìn une tematiche che i progjets a varan di tignî cont. Intal 2019 a colin i cinccent agns de muart di Leonardo, che al è passât pal Friûl e duncje il zûc al è facil». E cemût fasaraial – i domande il gjornalist – cui che si ocupe par esempli di Resistence o di Grande Vuere? «A studiaran lis machinis di vuere o l’umanisim in Leonardo», la rispueste de assessore. (Starìn a viodi).
Che il gjeni rinassimentâl al sedi passât pal Friûl al è ancjemò inciert, par tancj improbabil. Dut câs, chel che al lasse scaturîts al è il concet di fonde daûr dal plan de Gibelli (che di diretore de associazion “Navigli lombardi” e à za inmaneât iniziativis in omaç a Leonardo…): al sconcierte che dutis lis realtâts culturâls de regjon – grandis e piçulis – a vedin di «armonizâ» (e dîs la assessore) i lôr calendaris al teme sielzût, in pratiche di uniformâsi, cul risultât di uniformâ un panorame culturâl che al è simpri stât cetant vari e diferenziât, e par chest une vore siôr. Sul teritori a son tancj ents e associazions che a àn cjatade une lôr specialitât, un setôr propri, e che a àn bisugne dal contribût public par continuâ a esisti e a fâ ricercje, produzion e divulgazion culturâl. Cence «armonizazion», i finanziaments de Regjon no rivaran.
✽✽ Ma la politiche culturâl no varessie di sostignî lis specificitâts? Al è tes specificitâts che e sta la ricjece e lis competencis di ogni realtât culturâl. Chel che e domande la assessore Gibelli e je une sfuarçadure, che e puce di arogance. Tant par capîsi, cjapant sù l’esempli fat di une operadore culturâl: se jo o soi la massime esperte di frico, no tu varessis di domandâmi di fâ i cevapcici. Tai fâs istès, ma o fasevi une vore miôr il frico! Cussì, se un ent culturâl al fâs culture, al programe lis sôs ativitâts in armonie cui sogjets che al coinvolç, dal public ai artiscj, no daûr di un teme imponût dal alt. Ce risultâts, in tiermins di cualitât, podaraial puartâ chest sisteme? Âstu voie di celebrâ l’aniversari di Leonardo? Afide il progjet a cui che al sa, o introdûs un mecanisim che al premie cui che al svilupe chel teme, cun fonts e finalitâts disseparadis di chês altris ativitâts culturâls che si fasin in regjon e che a vegnin finanziadis. Ma no sta a imponi un teme a dut il tiessût culturâl de regjon.
✽✽ Tiessût che al domande ben altris atenzions. A son setemanis par esempli che si fevele dal avignî dal Museu “Gortani” di Tumieç, in grave crisi finanziarie. Propit par bocje de assessore Gibelli, la Regjon e à fat savê che e metarà lis risorsis par rilançâlu e che e je la volontât di ampliâ il rai di ativitât dal satûl dai ûs e costums de int cjargnele. Dopo dal anunzi, però, il cda de Fondazion si è dimetût e no si sa nuie dal plan di rilanç di une struture che e à un valôr pal teritori. Propit la impuartance che i ven ricognossude dal teritori – a cheste, come a altris, ben si intint – e varès di vuidâ ancje la erogazion dai contribûts publics (la Regjon e je daûr a meti man ai regolaments in materie), indispensabii – lu tornìn a dî – par rinovâsi, svilupâsi, cualificâsi e par fâ cressi la comunitât. E alore, se al è just che la Regjon e proponi la sô vision complessive dal teritori, al è sbaliât che no dedi pês aes resons dal teritori, tornant magari a centralizâ ciertis funzions (o jentrant te progjetualitât des ativitâts vincolantle al svilup di un teme determinât). Il teritori al va scoltât e rispietât te sôs diferencis. No dome tant che intenzion. ❚

di Erika Adami

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +