“Prime i talians”.
Disgracie pai furlans
✽✽ No mi plasin i cimitieris militârs. A rapresentin la imagjin distutive di chê tristerie umane che cun fature e ven calmade dal dûl e dal ricuart dai vîfs. Cuant che duncje mi è capitât di visitâju, o ai provât plui rabie che comozion, massime cuant che i cimitieris a son chei des vitimis de Grande Vuere, embleme e simbul de retoriche nazionaliste, che il Friûl al ospite il plui grant santuari, Redipulie; e chel, clamât il “cimitieri dai erois” a Aquilee, leât aes celebrazions dal Soldât no cognossût. Lûc vuê pôc cognossût, in realtât, ma che al è stât la ponte di diamant de propagande fassiste su la vitorie mutilade, celebrade prime di D’Annunzio e dopo di Mussolini. No jeri mai stât di persone, ma o vevi viodudis lis fotografiis dal stât di abandon che si cjatave e, dal vêr, la situazion mi è someade ancjemò piês de descrizion. La jerbe e parone, al somee che nissun a ‘nd vebi cure. Par tiere, i rescj di cualchi corone deponude intant di une cerimonie uficiâl, lis crôs inrusinidis dal timp e des intemperiis, i monuments funeraris che a testemonein la dismentie che ur è destinade, e lis peraulis scritis sul marmul che vuê a tornin su la bocje di politics e governants.
✽✽ Dôs a son stadis lis mês reazions. La prime e je che al somee che la storie a cualchidun no i vedi insegnât nuie, la seconde e je stade une domande: ma ce nazion ise chê che no à cure dai siei muarts? Mi soi dit che e je une nazion cence anime, buine di tantis peraulis, la retoriche apont, ma che no je in stât di tradusi in pratiche ogni pinsîr virtuôs.
✽✽ E no par câs mi rimbombave il sproc, tant cjâr ae Leghe di Salvini, chel “prime i talians” doprât par presentâ une linie politiche che e volarès jessi dongje dai interès dal popul. Le clamin sovranisim, che za di par se al rapresente une contradizion, memoreant une figure regnante, di dissendence divine, duncje sacre e che e contemplave sotans e no citadins.
✽✽ Ma dopo o soi lât plui inlà e mi soi domandât: ma il sovranisim talian ce puedial compuartâ pai furlans, di là dal aspiet morâl e ideologjic? Sempliç: dome par fermâsi ai grancj avigniments, dôs vueris mondiâls, emigrazion, servitûts militârs intal passât prossim e, intal presint, tassis, burocrazie cressinte, une autonomie simpri mancul speciâl e simpri plui dipendente di Rome, cul risultât che vuê o sin la regjon che e regjistre diviers macrofatôrs negatîfs: la denatalitât, la popolazion plui anziane, un Pil che al spaurìs, la desertificazion de mont, la pierdite di miârs di piçulis impresis, une agriculture che e je in agonie.
✽✽ E cuant che tu domandis a cui che al guvierne midiant di chel sproc, di meti in vore ats concrets par frontâ une situazion dramatiche – che nissun nol ameteve prime, o pensi ae Serracchiani, e nancje vuê, viôt Fedriga -, tu cjatis rispuestis di profîl bas come se e bastàs une aspirine par frontâ un cancar che al cres.
✽✽ Al sucêt di piês cuant che la rispueste pussibile e tocje progjets plui larcs, e in non dai solits “interès superiôrs” si tâs e si consint: îr Terna, vuê la tierce corsie, tant a pain simpri i furlans.
✽✽ No si trate di rimplaçâ, cemût che in maniere furbe si è fat in campagne eletorâl, “i talians” cui natîfs dal lûc, duncje no predicjìn un “prime i furlans” che al compuarte simpri e dut câs graduatoriis e un judiç che lis validi, ma la comprension che une idee federaliste e je stade cancelade e che e torne di mode, inmodernade e corete, une Patrie romane, cun atribûts italics che o vin za cognossût. E a son stâts berdeis seris par ducj, un disastri pal Friûl, che – cemût che si sa – di Patrie a ‘nd à une sole e no je piçule. ❚
Dree Valcic