Pai tiei fîs, sielç il furlan a scuele
✽✽ Al è timp fin ai 31 di Zenâr, pes fameis, di iscrivi i fruts a scuele e, al at de iscrizion, maris e paris a puedin decidi di inviâ cui lôr fîs un percors educatîf che ju vierç al plurilinguisim, sielzint che ur vegni insegnât il furlan. Ven a stâi une oportunitât par imparâ cun plui facilitât altris lenghis e par slargjâ lis competencis cognitivis e metacognitivis dai fruts. Une oportunitât che e nas de ricjece linguistiche dal nestri teritori, che e je previodude des leçs statâls e regjonâls e che no gjave oris di lezion, come che dispès si sint a dî, parcè che al jentre te cuote curicolâr di autonomie che la Regjon Friûl-Vignesie Julie e à decidût di doprâ par chest fin. Cun di plui, il furlan al pues jessi insegnât cu la metodologjie Clil, vâl a dî che i insegnants a doprin il furlan tant che lenghe di insegnament (e no come materie) par spiegâ altris contignûts.
✽✽ Lis criticitâts no mancjin. A son scuelis li che il furlan nol ven insegnât o al ven insegnât mâl. Tant che o vin dit plui voltis, al coventarès che ducj, a partî dai dirigjents scolastics, par lâ indevant cui mestris e lis stessis fameis, a fossin plui responsabii, parcè che dal mut di frontâ la cuistion al dipendarà doman l’avignî de nestre lenghe, ma za vuê e dipent la serietât di un sisteme e di une organizazion, come chei de nestre scuele, che a varessin di jessi un model crodibil e afidabil. ❚
Erika Adami
