PAGJINE TECNOLOGJICHE. Blogarins on line

Di cualchi mês sul sît dal Messaggero Veneto (www.messaggeroveneto.gelocal.it), tal cjaveç abàs de pagjine principâl, si puedin cjatâ doi gnûfs “Blog d’autore”: l’ûs de lenghe furlane e je la prime gnove che e tocje il visitadôr che al vierç chestis pagjinis.
Se e je vere che vierzi un blog su internet al è facilissim e si lu pues fâ ancje sore nuie cuntun pâr di clics, al è di preseâ chestis dôs gnovis presincis di presi sul sît dal gjornâl plui let ogni dì in Friûl.
IMPRESSIONS, VISIONS_ William Cisilino, diretôr de Agjenzie Regjonâl pe Lenghe Furlane (ARLeF), al firme il so “Impressions, Visions” (www.cisilino-udine.blogautore.repubblica.it), un diari batiât cuntun omaç a un nestri poete, stant che al è il titul di une racuelte di lirichis di Agnul di Spere. Par cumò la plui part dai siei intervents a àn tratât dal status legjislatîf sei de lenghe furlane che de nestre Regjon, scorsant la politiche di vuê cuntun voli soredut su la storie dal moviment autonomist furlan e su chês altris lenghis e altri popui europeans minorizâts. Interessant imparâ, par cui che no lu savès, che il Friûl al gjolt di une autonomie plui fuarte che no la Catalogne.
TIERE DAI PARIS_ Il secont autôr, zontât cun Setembar tal album dai blogs dal gjornâl di Udin, al è Christian Romanini (www.romanini-udine.blogautore.repubblica.it): un veteran dal imprest dai blog. Chel so personâl, molât di un pâr di agns, lu veve metût in contat cui furlans tal forest cuant che i social networks no jerin fuarts come in dì di vuê. Chest gnûf, sul sît dal Messaggero Veneto, lu à clamât in maniere etimologjiche “Tiere di Paris”, ven a stâi Patrie. Tai prin posts publicâts nol à metût vie la staze pes peraulis, doprade spiulant i concets di “piçule Patrie” e chel di “marilenghe”, lemis di doprâ cun cause.
Chescj doi gnûfs spazis di aprofondiment a acetin i coments dai utents, ma al è un pôc masse lunc il procediment di fâ par vê lis credenziâls par rivâ a inserî i propris pinsîrs. Dut câs, i singui intervents a son daûr a vê une fuarte circolazion vie email e ator pes plateformis “social” come Twitter e Facebook, dulà che in tic e tac si pues screâ une discussion. Chest al conferme dôs robis: e je une dibisugne dai furlans chê di vê spazis in lenghe furlane al pas cui timps par podê lâ plui in sot e disvilupâ sei il sintiment identitari che la discussion politiche.
Pai voi, lis dôs rubrichis screadis di fresc sul sît no son ni separadis, ni difarentis di ducj chei altri contignûts par talian. Cussì e je ancje la pagjine par furlan che e jes une volte par mês su la version di cjarte dal gjornâl, rincurade de Societât Filologjiche Furlane: sieltis no scontadis che però a rivin a fâ passâ il messaç che il plurilenghisim al è te normalitât di chenti. Il stes discors al va ben pes tabelis stradâls e tai uficis. Mancul normâl al è maraveâsi par chestis soluzions grafichis; se nus capite al vûl dî che al è ancjemò tant di ce fâ… e che spartîsi no nus jude. ■
Michele Calligaris