
Ancje il 2012 al à sierât la stagjon des vendemis…e dai concors di bielece.
Miss Italia, che si sedi a pro o cuintri di chestis manifestazions, al è une vitrine dulà che lis miss di chenti a àn fat fâ dispès une biele figure al Friûl.
Se no us interessin i risultâts, o podês almancul cjalâ cemût che chestis zovinis nus àn rapresentât. Po ben, in ducj doi i câs o podìn jessi braurôs di Alice Kristancic, une fantate di 21 agns di Cormons.
Ancje se e je rivade aes seradis finâls, ven a stâi tal grop des primis 101, e à zontât la sô vôs a chês che si son lamentadis dal funzionament dal concors, che a favorìs il centri-sud de Italie par vie che la int a partecipe di plui votant par telefon che no tal nord.
Diplomade a Cividât come Perît agrari, e jere stade la uniche che, fra lis tantis zovinis che a passavin sul schermi de television, e veve scrite, sot dal non, la profession: imprenditrice agricola.
Di fat Alice, par cumbinâ cheste interviste, nus à invidât te frascje de sô famee une sere di brut timp parcè che «O vin lis vendemis e o soi simpri impegnade»!
La aziende di famee e je su la strade che di Cormons e mene bande la Subide: un paradîs vert di stradis in sù e jù jenfri lis vignis a pîts de mont Cuarine, tal cûr de antighe Contee gurizane.
Bac e Venere si son cjatâts in cheste cjase, dulà che Alice e la sô famee a dan bon acet cul lôr tai. Nus conte «Finide la scuele agrarie, o ai scomençât a lavorâ te nestre aziende e ancje come ustire te frascje. O ai tacât a fâ i concors di bielece l’an passât… tant par ridi! Une sere o eri fûr cui miei amîs e o ai provât a notâmi a un. Me soi gjoldude e cussì, poiade ancje di gno sûr plui grande Elena, o soi lade a fâ ancje altris».
La none de miss, sintint il fevelâ, e interven «Mê gnece e veve molât di fevelâ par furlan par vie che a scuele no si lu insegne, ancje se culì in famee si fevele dome par furlan».
Alice nus conte «Di bon che o soi lade a fâ l’Istitût Tecnic Agrari di Cividât, dulà che e je une biele atmosfere e sei i students che i professôrs a doprin ancje il furlan. Ogni volte che o tornavi a cjase mi vignive normâl di fevelâ par furlan»!
La mari de fantate, insegnante tes scuelis dal oblic, si sint clamade in cause «No vin ancjemò i mieçs par insegnâ il furlan come che o volaressin. Par esempli: ce vino di fâ cui fruts che a decidin di no partecipâ a lis oris di culture furlane? Ancje prin des leçs di tutele, jo e cualchi mê coleghe o vin simpri cirût di fâ alc tes nestri oris. Si sin sveâts tart, ma al è impuartant tacâ».
Alice e zonte «Al concors, magari cussì no, mi à capitât di vê di difindi la nestre lenghe. Altris concorintis furlanis de nestre regjon a jerin plenis dai solits prejudizis: “furlan fevele buine par blestemâ” e v.i.. No rivi a capî cemût che si fâs a vele in asse cun alc che al è part de tô culture e dal to DNA! Jo, te stesse maniere, o ami la mê famee, Cormons e il Cuei».
Fevelant des zornadis a Montecatini, e conte «Plui di cualchidun, ancje fra i autôrs des trasmissions, mi àn domandât di dulà che al ven il gno cognon cussì pôc talian. Va a spiegâi tu dal miscliç di ints che al è tal gurizan o dal fat che i miei vons no àn acetât di talianizâsi in Cristiani o alc dal gjenar. Par fâle curte i disevi che al ven de Slovenie».
Alice, intant che e conte, nus mostre lis imagjinis de sô cjavale Raissa, la fasse di miss e un ogjet che, par jê, al è sacri tant che une relicuie di un sant: un pletri doprât di Bruce Springsteen.
«O soi rivade a fâmal dâ di lui l’an passât in chê date dal so famôs “Mandi Trieste!” O stavi combatint cun altre int par rivâ a fâmi viodi dal Boss, ma o jeri pardabon strache dopo tantis oris di conciert. Lui, però, si à inacuart di me e dal fat che o jeri rindude; dopo un moment al è vignût dongje e mi à pontâde par dâmi chest so souvenir». (bon voli il rocker!, ndr)
Progjets di ca indenant?
«Se e ven cualchi buine propueste di bande dal mont de mode o dal spetacul no i disarai di no, ma par cumò nol è rivât ancjemò nuie di seri. Tal avignî, dut câs, mi viôt in cheste aziende. La mê famee e sta planc plancut cirint di slargjâ la frascje. A Zenâr la tornarìn a vierzi plui biele e grande, dulà che si podaran ancje sercjâ i bogns prodots di chenti».
Il “tata”, daûr di nô, al fâs muse contente compagnade di un “sì” di sodisfazion cul cjâf.
Il miôr “Mandi” che si pues becâ a Cormons e je la simpatiche scletece di Alice. Nus salude cul sô ridi gaiarin tant che il boli di un blanc dal Cuei, nô i augurin fortune par ducj i siei progjets. ■
Michele Calligaris
LA INTERVISTE - / Toni Capuozzo: «Ognidun al bale cun sô agne»
Oscar Puntel
Nus à lassâts Toni Capuozzo, il grant gjornalist. A son za ce tancj i ricuarts che si viodin ator su di lui, parcé che al jere un om ce tant stimât e amât. Al jere un amì de La Patrie dal Friûl, e al à vût scrit ancje par nô. Sì, par furlan. Parcé che […] lei di plui +
Zovins di gale / Sborf, il zûc par induvinâ e imparâ peraulis par furlan che al à za concuistât miârs di personis
Erika Adami
Daûr un grup zovin che al à a cûr la lenghe furlane Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf […] lei di plui +
Galerie fotografiche / Cuinte edizion di “Stin dongje ae patrie”
Redazion
Pe rassegne Avostanis, Domenie ai 4 di Otubar li dai Colonos si è tignude la cuinte edizion di “Stin dongje ae Patrie“. La storiche riviste furlane e a fât fieste par i siei otante agns e e a cjalât al avignî adun cul mont de culture, de musiche, dal associazionisim, dal sport tal ricuart no […] lei di plui +
Stin dongje ae Patrie / La storiche riviste furlane e fâs fieste par i siei otante agns
Redazion
Pe rassegne Avostanis, Domenie ai 4 di Otubar aes 3 dopomisdì li dai Colonos a Vilecjaze di Listize tierce edizion di Stin dongje ae Patrie. La storiche riviste furlane e fâs fieste par i siei otante agns e e cjale al avignî adun cul mont de culture, de musiche, dal associazionisim, dal sport tal ricuart […] lei di plui +
La piçade / Salts, lavoradôrs e… laris. Almancul i laris a fevelin par furlan
Mastiefumate
Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant […] lei di plui +
Gnovis pai fruts / I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ
Redazion
Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano? ◆ A partî de fin di Jugn al è rivât tes ediculis dal […] lei di plui +



