TAL ETERE. La gnove stagjon di “Contile Juste”

“Chi si trate di fâ fevelâ la int. No simpri i solits trombons e, lu dîs cence problemis, tra i trombons mi met ancje jo!”. Il president de provincie di Udin, Pieri Fontanini, al bute la sô idee pal gnûf cicli di “Contile juste”, che – insome – e varà di jessi in struc: “plui int comun, mancul politics”.
Il program televisîf di aprofondiment produsût dal ent di Palaç Belgrât e finanziât di chest, ancje cul contribût de Bancje Unicredit, al torne daspò cualchi mês di pause e al larà indevant fin ae fin dal 2012.
“Chestis trasmissions – al zonte – a contin gnovis dal Friûl e sul Friûl; lis fasìn propit cu la funzion di dâ vôs in marilenghe, braurôs di fevelâle. E po, la nestre tiere e je plene di personaçs che magari no ducj a cognossin, e che a àn storiis, ideis, robis di condividi. Personaçs interessants dai nestris paîs, che al è just dâur visibilitât. Si trate di cirî e di contâ chês storiis che a meretin di jessi contadis”.
Confermade la formule “svelte” dal program. Il formât al darà spazi a trê / cuatri gnovis par  volte, cun intervistis e scandais. “L’obietîf al è propit chel di valorizâ lis bielecis dal Friûl: no dome chês dal ambient, dal paisaç, ma soredut chês des “ideis”. O sin siôrs di progjetualitâts che, dispès, no son valorizadis. Cussì, cun chest piçul spazi, o cirìn tal stes timp di promovi e di pupilâ la lenghe e la culture furlane”.
“Contile juste”, realizât dut in marilenghe, al cjape dentri realtâts e vicendis de Patrie. Diviers i temis tocjâts e spiegâts denant des telecjamaris: sanitât, economie, lavôr, turisim, ambient, tradizions e timp libar. In prin plan, ancje lis ativitâts dal ent di aree vaste, cun iniziativis tai diviers setôrs di competence.
A trasmeti il program, trê televisions locâls: Telefriuli, Telepordenone e Free tv. Chestis ultimis dôs a pandin il lôr segnâl ancje tal Venit, cuvierzint chê fasse confinarie considerade dentri dal Friûl storic.
L’apontament al è su Telefriuli, ogni sabide aes 7.45 sot sere e, in repliche, la domenie aes 9.30 di sere. Su Telepordenone: ogni sabide aes 9,15 di sere e, in repliche, la domenie aes 1.05 daspò misdì. Su Free, invezit, il tg de provincie al sarà trasmetût di vinars di sere, aes 7.35, e in repliche aes 9, e la buinore de sabide, aes 7.37 e aes 12.15. La trasmission e sarà disponibile, in streaming, sul web e duncje potenzialmentri visibile in ogni part dal mont: clicant te home page dal sît istituzionâl – www.provincia.udine.it – si cjate il colegament di acès. Te fin di setemane, viodudis ancje lis fassis oraris ocupadis in palinsest, al sarà cuasi impussibil, par cui che al è devant de television, no brincâlu. Si ben che al sedi trasmetût bielzà sui canâi plui seguîts, la robe che e à sodisfat il president Fontanini al è che “ancjemò altris emitentis nus àn contatâts par vê il program e trasmetilu. E chest nus fâs plasê: al vûl dî che o vin fat e che o stin fasint un prodot ricognossibil, che la int e viôt vulintîr e che lis nestris televisions a àn gust di trasmeti”. ■
OSCAR PUNTEL