Assemblee dal Friûl simpri plui dongje

Salacor, cuant che chest numar de “Patrie dal Friûl al vignarà let, a saran di bielzà stâts riunîts i Conseis provinciâi di Udin e Pordenon. Almancul cussì o speri.
Li e varès di jessi stade finalmentri deliberade – in spiete che si decidin a fâlu ancje a Gurize – la costituzion de Assemblee dal Friûl clamade o Associazion des Provincis furlanis o Comunitât dal Friûl. Nô no si ustinìn su une nomenance o su chê altre . Ce che nus interesse al è che il Friûl, fin vuê dividût in trê Provinciis, al cjati une strade par metisi finalmentri adun. Cence paronance di une bande su chê altre, mantignint lis individualitâts di Gurize, Pordenon e Udin e des lôr provinciis. Ma metintlis insiemit par lassâ a ognidune di contâ di plui e cun chel permeti al Friûl unît di domandâ i siei dirits tant sul plan storic, che sociâl e culturâl a front di Triest, di Rome, di Bruxelles. Nol puarte di nissune bande che cualchi sorestant di Udin, Gurize o Pordenon al disi che cheste Associazion no a di vê significât al di fûr di une colaborazion di stamp aministratîf. Tai fats si met insiemit trê Conseis provinciâi elets di ducj i furlans (a mancjin dome chei dal mandament di Puart!), par decidi dut un l’avignî dal Friûl e dal sô popul e chest al sarà impuartanton. Te regjon Friûl – Vignesie Julie e in Italie chest fat di unitât dal Friûl, fin cumò sparniciât, al darà cussience a ducj che il Friûl e i furlans a son un popul. Cun dutis lis sôs esigjensis che a varàn di jessi tignudis in cont plui che sostignudis in maniere separade, provincie par provincie. Al sarà clâr, anzit un grum clâr, che cheste Regjon e je fate di Triest e dal Friûl. Ce mai “friulgiuliani “ o “Friuli Venezia Giulia “ cence lineute!! Ancje il gnûf Statût regjonâl al varà di tignî cont di cheste realtât storiche, culturâl e linguistiche. E su chê fonde, furlans e triestins (ancje se metûts insiemit par resons politichis talianis e forestis) a podaran convivi pal miôr, ognidun vint rispietade la sô identitât, la sô autonomie e adatadis formis di autoguvier. Sì, parcè che il Friûl unît, cu la Associazion des Provinciis furlanis e cul contribût des categoriis economichis e dai Sindacâts dai lavoradôrs, al podarà realizâ progjets pal disvilup economic, sociâl, culturâl che a vadin dal gurizan, al udinês, al pordenonês, ae Cjargne. Chestis competencis, compagnadis di risorsis finanziariis, a rivaran a lis Provinciis furlanis, come ai Comuns riunîts tai Ater, su la fonde de riforme federaliste de Regjon che, come che e stabilìs la leç regjonâl n. 1 dal 2006, e à di lassâ ae Regjon dome podês legislatîfs e di programazion, destinant dutis lis funzions di atuazion aes Provinciis e ai Comuns singui e asociâts sul teritori. Al incontrari di ce che al è sucedût fint cumò, come cui progjets che la Zonte regjonâl e cîr di imponi pal curidôr 5, pai eletrodots, pes cassis di espansion des aghis dal Tiliment e v. i. Cuntune riforme federaliste serie o podarìn duncje vê insiemit, tant che un Friûl ricostituît te sô unitât storiche, che une forme di autoguvier che al lassi decidi ai furlans il lôr avignî. Come che sîs agns indaûr cincuante mîl furlans a vevin domandât firmant la Petizion pe Assemblee des Provinciis furlanis e l’autoguvier de nestre tiere. Ma par vê tai fats chest grant progjet cetant che al sarà di sudâ e di scombati par vinci lis resistencis al cambiament! Masime di chei che vuê e doman a àn e a varan il podê de Regjon e che a fasaran di dut par no molâ la borse e lis clientelis eletorâls!