INTERNAZIONÂL. La Cine e scrîf al Friûl

La visite, la seconde tal zîr di 5 agns, dal Dalai Lama in Friûl e à lassât une ricuart une vore positîf in ducj chei che lu àn incuintrât: istituzions e students che a àn jemplât la sede dai apontaments vûts ai 22 e ai 23 di Mai. Ma l’entusiasim pal messaç di pâs puartât de vuide spirtuâl dal Tibet in esili no je stade la uniche conseguence.
Ai 28 di Mai, la Ambassade de Republiche Popolâr cinese a Rome e à spedît un fax di amonizion a la Regjon Friûl-VJ, a la Provincie e al Comun di Udin, manifestant dute la sô contrarietât par chestis iniziativis inmaneadis in Friûl.
No je tardade la rispueste dal on. Pieri Fontanini, President de Provincie di Udin che, riclamant i principis di democrazie e di rispiet des minorancis, al à volût marcâ la impuartance dai rapuarts tra i  popui piçui, cence nissune intezions soversive, come che tal fax de ambassade cinese si podeve capî.
Fontanini al à ancje fat presint che e je stade stigmatizade la violence che l’esercit cinês al fâs cuintri i tibetans e «che se si varà di cjatâ une soluzion pe cuistion dal Tibet, che e sedi atuade chê che e rispiete il volê dal popul tibetan di vivi in pâs e autonomie tal so teritori».  ■
Redazion