Leturis pal Istât

Istât, timp di vacance e magari di polse. No puedie cheste jessi une buine ocasion par cjatâ ancje il timp di lei alc e magari di cirî di lei alc par furlan? Din alore une cjalade a cualchidun dai libris vignûts fûr tai ultins timps che si podarès puartâsi daûr al mâr o su pai monts.
Pe narative si podarès tacâ cuntun romanç zâl, il libri di Adriano Nascimbeni vincidôr dal premi Sant Simon di Codroip, “Jo e Luzie, un delit di paîs” (Forum), po dopo si podarès passà a lis contis picantis e ironichis di “Ses e Barete” (KappaVu) di Francesca Gregoricchio. Pai amants de ironie o par cui che nol à mai vût ocasion di leilu, e jê po dopo la pussibilitât di cjolisi, tal decenâl de muart, lis ristampis frescjs frescjs, dai libris di Riedo Puppo. Par esempli il so “Par un pêl” rivât dal 1960 in ca, ae none ristampe, che al è di sigûr un dai libris furlans plui vendûts e lets di simpri.
Di conseâ ancje la opare vignude fûr di poc par cont de Societât Filologjiche Furlane, su un altri grant personaç de narative furlane, “Dino Virgili… chel frut dai cuêi”.
Al vâl po dopo la pene di cirîsi i ultins doi numars de riviste “La Comugne” (KappaVu), che a son, come simpri, un miôr di chel altri.
Par fâsi un dôs ridadis, che al fâs ancje bon sanc, e dismenteantsi lis ideis masse cervielotichis dai colaboradôrs de Patrie dal Friûl, no si varès di fâsi scjampâ il libri antologjic di Gjelindo Titiliti “Copefastidis ma no dome!” (Ribis) Di Gigi Mestroni.
Par finî cui amants de poesie, l’Istât a puès jessi une biele ocasion par là a leisi la racuelte “Rondeau, venti variazioni d’autore” (Forum) che e met adun lis poesiis di grancj poetis forescj e talians voltadis par furlan tai agns di Pierluigi Cappello. ■
Maurizio Biasizzo