VIERTIDURE. Union Popolâr Furlane

Ce che dispès al ven rimproverât al autonomisim furlan al è chel di no vê mai sfondât come moviment politic teritoriâl. I esemplis che si cuintriponin tai discors che a san di “o volarès, ma no pues” a son la Südtiroler Volkspartei e la Union Valdotaine. E je vere che il Moviment Friûl al à vude une presince fondamentâl par tancj agns in consei regjonâl e ancje tai ents locâi, ma in dì di vuê al rapresente un sogjet plui di ispirazion ideâl, che no un moviment politic operatîf par vie di une sielte fate de sô dirigjence sul scomençâ dai agns Novante. Une posizion sigûr legjitime e rispietabile, ma che cumò nus viôt vuarfins di un partît che al à podût gjoldi di percentuâls eletorâls di dut rispiet e che inmò vuê, pûr no jessintsi presentât di resint a lis elezions, al stice.
Subit dopo dal taramot si à provât a fâ il “salt a Rome” cu la Union Popolâr Furlane, come che nus conte Mauro Tosoni «Chel de UPF al fo propit un tentatîf eletorâl che al cirive di meti adun ducj i sogjets dal autonomisim: Coordenament des Tendopolis, Moviment Friûl, Comitât pe Universitât, Glesie Furlane e ancje la Union Slovene».
Il risultât al fo positîf e negatîf “O vin partecipât a lis elezions politichis dal 1979 e o vin cjapât sui 30000 vôts che su scjale regjonâl a rapresentavin il 4,4%, ma il nestri om plui votât, il prof. Remo Cacitti di Vençon, magari cussì no, nol à rivât a jessi elet in Parlament” al conte Tosoni.
Ma no dut al è lât pierdût «Se dal pont di viste eletorâl o vin falide la elezion e il progjet de liste si è sfantât» nus spieghe «di chê altre o soi invezit convint che la semence no je lade straçade e par gno cont nol è un câs che di li a cualchi mês e je nassude Radio Onde Furlane, sul spirt che al veve motivade tante int a pro de cause dal Friûl: tai prins agns 80 la Radio e à promovût impuartantis iniziativis come lis 60.000 firmis par domandâ la tutele de lenghe furlane a Rome o lis 90.000 cartulinis pe division de Regjon in doi tocs: Friûl e Triest». ■
Christian Romanini