Sfuei Mensîl Furlan Indipendent
Archivi de Patrie

TERITORI. Par un reâl disvilup sostenibil, prin che al sedi masse tart

Walter Tomada

Une volte al jere il Friûl des viciniis e dai ûs civics; la modernitât cumò invezit nus mostre un teritori glotût di ciment e capanons, dulà che il cambiament dal paisaç nol à cjalât in muse a nissun, lant daûr ai interès individuâi e ae voie di slargjâ ativitâts economichis cence dispès cirî masse compromès cul benstâ de comunitât e la cualitât dal vivi. Cumò al è rivât forsit il moment – sperant che nol sedi masse tart – di cjalâ il disvilup de nestre tiere in maniere plui leade ae sostenibilitât: che no je une peraule vueide, ma il considerâ cemût che ogni sielte e impliche un judizi tra i beneficis e i coscj che e pues puartâ no al singul o a une particolâr categorie di personis ma ae interie comunitât.
E je cheste in struc la evoluzion de concezion furlane dal guvier dal teritori che e ven fûr de analisi di Sandro Fabbro, une autoritât par ce che al inten la planificazion teritoriâl, ma soredut un che al cognòs ben la storie di chenti e al pues frontâ l’argoment cun plene cussience des sôs implicazions.
Isal pussibil pensâ di sielzi “di bessôi” cemût governâ il disvilup di un teritori o vuê si riscjal di cori daûr a une utopie?
Une volte, sburtâts di cheste ambizion, si podeve meti in vore esperiencis une vore interessantis. In Friûl lu vìn dimostrât tai agns che a son vignûts daspò dal taramot. E no stoi fevelant de sacrosante braure che o vìn de ricostruzion, o des sieltis di organizazion de vite comunitarie che a son stadis cjapadis, in cierts câs conservatîfs e in altris situazions “rivoluzionaris”, ma in ogni câs puartadis indevant interessant la int. O pensi soredut che di chel model di guvier dal teritori e je vignude fûr la esperience dal Plan Urbanistic Regjonâl che al jere ae avanguardie in Italie intai agns ’80. In chel moment storic o vevin plene cussience dai problemis e o vin cjatadis daurman lis soluzions.
Sburtâts dal taramot…
O vin fat di une disgracie une clâf di disvilup. Ma nol capite simpri cussì. Di fat la evoluzion de societât e de economie daspò che il Mûr di Berlin al è colât no nus à cjatâts cussì pronts. Jessisi cjatâts dut un colp devant di un mont cence cunfins nus à imbacuchîts. La globalizazion, cui siei flus di bens, oms e bêçs, e finìs par mudâ ancje lis condizions di guvier dal teritori, soredut in rapuart aes sieltis che lis comunitâts a puedin fâ. Ancje parcè che e je lade in vore intant la integrazion europeane, cun dut il soreordenament che e puarte cun se.
Duncje jessi autonims fin dapît al è impussibil…
Se o pensassin di resonâ dome sul nestri teritori in tiermins isolâts, gjavantlu dal contest dulà che al è dentri, no fasaressin il ben de nestre tiere. Al covente capî fin dapît dutis lis conseguencis dai procès di interazion cui paîs e lis realtâts che si cjatin sedi dongje che lontan di nô. Al è fondamentâl sielzi lis opzions strategjichis.
Fevelial di infrastruturis?
Sigûr. La opzion dal Curidôr 5 e je pardabon di interès dal Friûl, e si pues – anzit si scuen – resonâ dome su cemût atuâle cun mancul impat negatîf pussibil e dant plui conessions che si pues ae int e ai centris di interès economic sul teritori. Ce che invezit al podarès jessi fondamentâl pal sisteme Friûl se al ves di governâsi di bessôl al è sclarî se lis fabrichis e lis aziendis di chenti a àn di poiâsi par fuarce su Triest e sul so puart o se invezit al podarès jessi cualchi vantaç a jentrâ in relazion cun Vignesie o cun Cjaudistrie. Se i furlans a fossin indipendents, chest al sarès un argoment di frontâ “fasint sisteme” e cjalant lis robis – come che a fasin ducj a nivel globâl – intune visuâl di colaborazion o competizion.
E invezit in ce maniere aial cjalât il Friûl al guvier dal teritori tai ultins agns?
Purtrop o vin capît une vore tart i efiets de globalizazion sul teritori e no vin prontât imprescj di guvier dal teritori che a coventassin a slargjâ i beneficis dal gnûf senari e a ridusi i coscj che al à vût jessi deventâts tiere di concuiste par capitâi forescj. Par esempli, l’impat che i centris comerciâi a àn vût sul nestri paisaç. ■
Walter Tomada

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +