Sfuei Mensîl Furlan Indipendent
Archivi de Patrie

LADINIE. Fiestis di identitât ladine e romancie fûr dal Friûl

............

Chest mês e cole, ancjemò une volte, la Fieste de nestre Patrie furlane che e ricuarde la nassite dal Stât patriarcjâl furlan ai 3 di Avrîl 1077. Une date une vore impuartante pe nestre storie che e segne la costituzion di un teritori metût sot la jurisdizion feudâl dal Patriarcje di Aquilee fintremai al Cuatricent. Un teritori che al veve parfin un Parlament, formât di siôrs e di libaris comunitâts, che il Patriarcje al veve di rispietâ.
Lis iniziativis par memoreâ cheste date nus àn puartât a domandâsi ce che al sucêt tal mont ladin e se ancje chei altris popui e vedin ricorencis similis. Di ca e tache, duncje, la nestre ricercje.
LA FIESTE DE UNITÂT LADINE_ Une date impuartante pal mont ladin e je chê dai 14 di Lui, cuant che si ricuarde la unitât ladine. Di fat, i Ladins dolomitans a son sparniçâts su trê diviersis provinciis e no esist une unitât politiche, ma la comunance linguistiche e culturâl e je di sigûr fuarte. Ve alore che la “Union Generela di Ladins dla Dolomites”, la associazion storiche che e cîr di promovi la unitât ladine, e à sielzût la date dai 14 di Lui par meti adun i ladins e fâ jeve su la lôr apartignince comune.
La date e ricuarde la grande manifestazion popolâr tignude sul pas Siele tal 1946, cuant che la int si jere dade dongje par domandâ al gnûf guvier statâl, dopo la fin de Seconde Vuere Mondiâl, la riunificazion dai ladins. Di fat, dopo il 1945 a ierin nassudis a Cortine la Union Popolâr Dimpeçane e a Meran la Union Culturâl dai Ladins che a vevin tacât a burî fûr volantins cul messaç: “O sin cinc bielis valadis, o vin tantis pussibilitâts di disvilup… Metìnsi adun”. Tal 1946 al nassè il partît politic “Zent Ladina Dolomites” che al riclamave la parificazion de lenghe ladine cun chê todescje e taliane, l’insegnament, la toponomastiche e la aministrazion par ladin, la creazion di un organisim ladin autonomist. Al fo propite chest grop politic a inmaneâ la manifestazion dai 14 di Lui che e tirà dongje ben 3000 ladins di dutis lis zonis. Vuê la fieste e je celebrade devant dal ricès Salei a Canazei in Val di Fasse, là che al è poiât un monument in ricuart dal fat, cu la scrite “Inant adun”, ven a stâi “Anìn indevant insieme”.
LA FIESTE DE LENGHE E DE IDENTITÂT CULTURÂL LADINE_ Ae fieste pe unitât ladine si zonte chê imbastide tal 2009 tal Fassan (a Poza di Fasse): si trate di une fieste di lenghe e identitât culturâl ladine, cognossude come “Aiusciuda ladina” (“Vierte, primevere ladine”) par vie che si ten ai prins di Mai e che e ricuarde la date storiche dai 5 di Mai dal 1920, cuant che pe prime volte i ladins di Siele e larin incuintri ai ladins di Gardene par mostrâ la volontât di creâ un popul unic par storie, lenghe e culture. La fieste e je componude di cinc zornadis di discussion, teatri, musiche suntun teme precîs (come l’artesanât ladin, la economie ladine, il lengaç e vie indenant), organizadis dal Comprensori Ladin, de Union di Ladins de Fascia, de Scuele ladine, dal Istitût Culturâl ladin, cul jutori de Provincie di Trent. E intint valorizâ la lenghe e lis risorsis dal teritori, specialmentri de Val di Fasse.
LA MANIFESTAZION “CONVIVENZA” TAI GRISONS_ Tal cjanton dai Grisons no je une zornade par ricuardâ la identitât e la culture romancie, e chest al è sclarît dal fat che il romanç e je une des trê lenghis feveladis tal cjanton svuizar, insieme al talian e al todesc. No je duncje une unitât linguistiche che e permetedi une fieste “comun”. Ma, stant che lis diviersis comunitâts a àn pôc scambi e comunicazion tra di lôr, la Lia Rumantscha (che e je la principâl organizazion di promozion e tutele dal rumanç) e à inmaneât tal 2010 une manifestazion, clamade “Convivenza- Gemeinsam en Grigioni”, cul intindiment di tirâ dongje int di culture e lenghe diferente de zone e scombati cuintri i conflits e la mere sorevivence, par costruî insieme une comunitât madure, imparâ a vivi insieme e no dome un dongje di chel altri, e rinfuarcî la coesion te diviersitât.
L’event si è tignût ai 16 di Otubar dal 2010 a Cazis e a àn partecipât ancje la Pro Grigioni Italiano (associazion di promozion dal talian tai Grisons) e la Walservereinigung Graubünden (pe tutele dal todesc e de variante walser).
Cheste fieste e je par cumò restade uniche, ma e rapresente un model di puartâ indevant par riclamâ la atenzion su la diviersitât e la ricjece de identitât dai Grisons che a son pardabon une piçule Svuizare, par vie che intun sôl cjanton a son trê lenghis des cuatri nazionâl tai trê cjantons svuizars. ■
Ilarie Colùs

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +