SPECIÂL – La gnove maniere di comprâ verdure in Friûl

Ca di nô lis feminis, tai centenârs di paîs sparniçâts vie pal Friûl, sot sere a son simpri ladis “a cjapâ sù di cene” tal ort. La nestre fortune e je chê di cognossi il savôr des robis fatis in cjase, parcè che la economie furlane e à vût lis fondis fin a pôcs agns indaûr propit te agriculture. Magari cussì no però, ancje chi di nô la industrializazion e la globalizazion a àn scomençât a gloti il nestri sisteme di vite e la nestre alimentazion e si sin pleâts a prodots che a rivin cuissà di indulà.
DI BESSÔI_ Nol varès di jessi dificil pe int furlane tornâ a svicinâsi ai prodots locâi, stant che no si è mai slontanade dal dut. E je vere che la comoditât di vê la salate za lavade dentri tun scartòs nus à fat dismenteâ che aes nestris nonis ur vignaressin i sgrisui a viodinus mangjâle, ma si sa che la vite moderne e va cussì di corse che cualchi volte si sta di mancul a cjatâle pronte, che e je dome brie di metile te terine e di cuinçâle! Se propit no si à voie di cjapâ sù la sape par gjavâ la jerbe jenfri lis jechis, di leâ i pomodoros, o di spelâ i fasui, si pues simpri lâ intune di chês aziendis che a son ancje in Friûl e jemplâ lis sportis cun verdure frescje e pomis di stagjon, cence lâ a cirî cjariesis il mês di Novembar cuant che invezit al è il timp dai cacos! Par vê lis pomis e la verdure a chilometris zero, cence fâ masse strade, si pues lâ par esempli a Nearêt di Prât, te aziende l’Orto Genuino, là che e je une famee che e colte e che e vent i siei prodots sul puest. Se si da un cuc su internet si cjatin ancje altris aziendis che a vendin la lôr robe in cheste maniere www.friuliveneziagiulia.coldiretti.it, www.biologicofvg.it, par esempli) e cualchi volte si pues lâ di bessôi a cjapà sù ce che al covente. Cualchi mês indaûr, cun di plui, e je stade presentade une vuide ae vendite direte tes aziendis agriculis in provincie di Pordenon, fate de Coldiretti di Pordenon in colaborazion cu la Cjamare di Cumierç.
IL MARCJÂT DAL CONTADIN_ A son ancje i marcjâts (Farmer’s markets par inglês), li che i contadins a rivin cui lôr furgons e a metin fûr sui bancs i prodots. Un di chescj, il prim in regjon, lu àn screât tal mês di Setembar dal an passât, in vie Pozzuolo a Udin, li de aziende agrarie universitarie “A. Servadei” (viert ogni secont e cuart vinars dal mês des 9.30). A Pordenon, in Place Risorgimento, lis massariis a fasin la spese tal marcjât di miercus e di sabide a buinore, e la int e je contente di cjatâ la cualitât a un bon presit, cuntun sparagn di ducj i coscj che a son te filiere (confezionaments, traspuarts, intermediaris).
DUCJ IN GRUP_ Une altre modalitât e je chê dai “gruppi di acquisto” li che un pôcs di consumadôrs a decidin di metisi insieme par comprâ i aliments fats dai piçui produtôrs locâi. La robe cjolte e ven dade fûr a chei che a partegnin al grup, singui e fameis, cussì si à il sparagn e la cualitât insieme. A Budoie il Gruppo d’acquisto della Pedemontana e a Buie il Friulgas a metin in vore cheste filosofie cun chê di promovi un consum eco-compatibil e ategjaments che a tegnin di voli il rapuart saltût-om-ambient.
Ducj chescj sistemis a àn za un bon sucès in regjon e no son dal sigûr novitâts, ma pussibilitâts in plui par tornâ a gjoldi ancje i savôrs di un timp.
Elena Zanussi