DI BESSÔI – SANITÂT. Se la Europe nus cjale no vin di vê pôre

Hospice, lote aes dipendencis e ai incidents stradâi e soredut tante inovazion. A son chestis lis primis prioritâts che al mostre Bordon se i ven domandât dulà che secont lui al coventarà sburtâ la programazion sociosanitarie tai agns che a vignaran in Friûl. «O sin ducj contents che i nestris vielis a vivin di plui: dut câs vuê dispès no àn plui dongje di lôr che rêt de famee che e viodeve di lôr e intun contest dulà che tancj anzians a son di bessôi o lontans dai lôr parincj, dâ rispuestis di salût al devente plui dificil. La soluzion no je la ospedalizazion ma un model dulà che si scuen sigurâ simpri plui continuitât ae assistence par ducj i malans che un al pues frontâ cence jessi slontanât de sô cjase e de sô vite».
RIVOLUZION TECNOLOGJICHE E ORGANIZATIVE_ Pes malatiis di lungje degjence, po, oltri a Rsa e Hospice, bisugne pensâ a cemût assisti «chei che in presince di tumôrs a rivin a vivi par agns in fuarce des gnovis curis che a judin a frontâ la malatie oncologjiche». Vê un voli simpri viert ae tecnologjie al è indispensabil: parcè che in pôcs agns la diagnostiche digjitalizade e à cambiât une vore lis robis e e à cambiât in miôr i modei organizatîfs. «Une lastre fate a Tumieç vuê si le lei a Udin in timp reâl e il miedi nol covente plui cu la sô presince fisiche sul puest dulà che si cjate il malât.
Cheste e je une rivoluzion, se la organizazion e capìs i vantaçs dal lavôr “a distance” e e imbastìs dut ce che al covente par doprâlu al miôr” cul obietîf di puartâ simpri mancul intal ospedâl e dome cuant che al covente, dant invezit sul teritori rispuestis plui adatis e no invasivis».
Il mûr plui dûr al reste chel de prevenzion cuintri dal abûs di sostancis, dal fum al alcul aes droghis: un lavôr che al paiarà intal lunc periodi. «Ma no si pues stâ a cjalâ che la prime cause di muart di int zovine a son i incidents stradâi. E chei, ancje cuant che no copin, dispès si strissinin daûr problemis di salût permanents o une vore luncs di vuarî. Par chest bisugne pontâ su la educazion al vivi san, che e covente ancje cuintri dai tumôrs e des malatiis cardiovascolârs».
CONTINUÂ TES RIFORMIS_«Bisugne cjalâ indevant, insome»: e Bordon al fâs un altri esempli di cemût che in cheste Regjon si è rivâts a une situazion di avanvuardie vincj agns prin di dute Italie. La Riforme Basaglia e je vuê dade par scontade, ma e je partide di chi jenfri une schirie infinide di polemichis: «ma chi si è fat un sfuarç prin che inaltrò par sperimentâ une gnove cure, fate di interazion tra la famee e il malât, di inseriment lavoratîf e di une gnove relazion cu la comunitât. E je stade la rivoluzion che e à vuidât un cambiament radicâl de psicoterapie a nivel european». «Se la Europe nus cjale, no vin di vê pôre, anzit – al siere Bordon – la nestre sanitât e à di cirî di acreditâsi a nivel continentâl pe sô cualitât». Nol è un câs che de Gjermanie, e cumò ancje de Russie, a son simpri plui lis assicurazions che a cirin di convenzionâsi cu la sanitât furlane par sigurâ i turiscj che a vegnin te nestre tiere in feriis. ■
Walter Tomada