I prins a tignî alte la vuardie su lis prospetivis de gjestion dal dirit al studi cu la gnove idee de Regjon di inmaneâ une Fondazion in lûc dai doi Erdisu a son propit lôr, i students universitaris. Par chest a stan lavorant a un apontament public dulà che a frontaran la cuistion cu la metodologjie di lavôr che si adate a students universitaris: no cjacaris, ma une analisi funzionâl dal dirit al studi e une analisi comparative dai doi organisims che cumò a lavorin in chest cjamp: l’Erdisu di Triest e chel di Udin.
Une iniziative che e rive daspò il prin resonament che e veve fat propit la rapresentance dai students dal Coordenament regjonâl pe alte formazion dal Friûl-Vignesie Julie, sintûts i programs che e à la Regjon, cussì come che ju à presentâts l’assessôr regjonâl ae Istruzion e Universitât, Roberto Molinaro: une fondazion di partecipazion, tant a dî un ent di dirit privât unic par dute la regjon, garantint la rapresentance dai student e i stes finanziaments regjonâi, se no di plui (11,5 milions tal 2011, confermâts tal 2012).
I TRÊ DUBIS DAI STUDENTS_ Dut câs, a son trê lis perplessitâts mostradis propit dai students in forme unitarie, ven a stâi tant chei di Udin che chei di Triest: la funzion dai privâts te Fondazion; il fat che si è in spiete di une gnove normative nazionâl in fat di dirit al studi; la unificazion teritoriâl de gjestion dal dirit al studi.
«Achì no je cuestion di difindi cjampanii – a àn sotliniât – si trate invezit di tignî ben presint che lis necessitâts locâls a son diferentis tra Udin e Triest, par vie che ogni realtât e à lis sôs peculiaritâts, che a riscjin di no jessi consideradis ad implen intune situazion aministrative unificade». In sumis, ur pâr al è che i doi Erdisu a àn mecanisim di funzionament difarents par vie che difarent al è il criteri di gjestion. Par chest a son modei dificilmentri standardizabii, si ben che in dì di vuê a conventin razionalizazions.
LA PERPLESSITÂT DE COMPAGNO_ Dal retôr di Udin, la professore Cristiana Compagno, nissun prejudizi ideologjic in mert al dissen regjonâl e nancje a programs di razionalizazion, come che par altri e dimostre la sô azion in chescj agns ae Universitât di Udin. Lis sôs a son osservazions che a partissin de analisi dal progjet come che al è stât presentât: «Il dissen juridic di chest sogjet di dirit privât che al metarès in cubie i doi Erdisu nol è clâr e nancje i problemis economics-strategjics che al varès di risolvi», e spieghe. E po e zonte: «In ogni procès di razionalizazion, prin si definissin a clâr i obietîfs economics-strategjics, po si fasin lis simulazions di ce che al varès di deventâ e su chestis fondis si decît». Si che duncje, in chest moment, «stant la inciertece funzionâl e strategjiche dal progjet de Fondazion o pant lis mês perplessitâts, par vie che no viôt a clâr. O viôt invezit benon – e continue – i potenziâi pericui di une uniche Fondazion, in mert ae aderence a lis esigjencis specifichis dai students de Universitât di Udin; al vignî al mancul de sinergjie tra l’Erdisu e la Universitât, sedi par i servizis imobiliârs, sedi par chei ae persone e in definitive il pericul di câl de cualitât dai servizis pai nestris students». Cun di fat, i servizis leâts al dirit al studi a son come un vistît di un sartôr: a àn di jessi su misure e chest al compuarte une contiguitât tra l’organisim che ju eroghe e la Universitât e une operativitât sul teritori.
FONTANINI CUINTRI DE FONDAZION UNICHE_ De bande de politiche, il president de Provincie di Udin si è pronunciât a favôr de Fondazion, ma al à metût un “alt” ae Fondazion uniche: «Une sole no va ben, e convente une par ogni Universitât – al conferme –. A son difarentis e si scuen difindi la autonomie di ognidune e des lôr diferencis, si no a saltin fûr dome pastiei. E stant che o savìn cemût che son ladis lis robis pal passât, o dîs in anticip: vonde penalizâ il Friûl». ■
Antonella Lanfrit
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +