L’EDITORIÂL – La situazion de tutele linguistiche

A dîs agns de aprovazion de Leç 482/99, se o vessin di fâ un cuadri su la aplicazion efetive dai dirits linguistics e su la cressite dal status dal furlan il panorame si presentarès cun lûs e ombris.
Lis leçs di tutele, chê statâl e chê regjonâl, la leç 15/96, a son stadis dal sigûr utilis e impuartantis massime par chel che al inten il “status”; pensìn al lavôr che si à podût fâ dentri des aministrazion publichis (par esempli, i sportei linguistics) o ae cartelonistiche bilengâl, ai progjets sostignûts tes scuelis, a nivel culturâl, editoriâl e te comunicazion.
Dal sigûr, l’impegn nol è ancjemò suficient, lis risorsis a son ancjemò pocjis ma, o torni a dî, a nivel di “status”, di “cussience” dai citadins e des citadinis furlanis si son fats grancj pas indevant.
La int e rivendiche, ogni volte che e pues, il dirit e la volontât di doprâ la lenghe furlane in ogni setôr: pensìn aes adesions simpri une vore numerosis (a dispiet des polemichis politichis e di spetancis dispès frustradis) dai gjenitôrs pal insegnament dal furlan tes scuelis, al preseament une vore alt pandût pai pôcs prodots di comunicazion e di intrateniment in television e par radio, al preseament e al tacament al furlan (e/o a chês altris lenghis regjonâls) che a saltin fûr dai scandais sociolinguistics.
Pecjât che, a pet di chestis domandis e di cheste cussience dai furlans, la classe politiche e rispuindi dispès in maniere dal dut inadeguade, baste visâsi dal nivel di discussion in consei regjonâl vie pe aprovazion de gnove leç regjonâl fate buine ae fin dal 2007.
E pûr, ae fin, la leç 29/2007 e je – se e vignarà metude in vore – une buine leç di politiche linguistiche e e permetarès finalmentri di intervignî di plui, massime tal setôr de scuele e de comunicazion.
Purtrop i segnâi che a rivin dal mont politic a fasin bacilâ: cualchi pont de leç al è stât impugnât dal guvier nazionâl che i critiche la costituzionalitât. Cumò – ancje se daûr de mê opinion ancje i articui contestâts a son dal dut in acuardi sei cu la Costituzion sei cul Statût di Autonomie -, la gnove zonte regjonâl (fate di fuarcis politichis che, fûr de Leghe, a àn ostacolât a fuart sei la leç di tutele dal furlan sei chê dal sloven) e à “congjelât” une leç votade e fate buine dal consei regjonâl, blocant soredut il percors dentri de scuele.
Baste pensâ che, rivuart aes disposizions de gnove leç, dopo plui di un an – intant che la ARLeF e à puartât indenant i compits che i son stâts dâts -, la Regjon e je dal dut ferme e e à ancjemò di butâ jù une schirie di regolaments atuatîfs e di meti in pîts la Comission permanent pal insegnament.
Dal rest a son coventâts ben nûf mês ancje par nomenâ i gnûfs components dal Cda de Agjenzie; se o metìn dongje chest “spietâ” de aministrazion regjonâl a cualchi declarazion su la volontât di tornâ a viodi la leç 29 e a cualchi propueste di leç su la “tutele dai dialets e des fevelis locâls” che a somein presentadis plui “cuintri” che “par”, alore lis preocupazions a scomencin a vê une fonde.
In definitive, o podìn dî che i imprescj legjislatîfs a son, si à di metiju in vore, magari un pôc a la volte ma cu la volontât di lâ indenant, di no tornâ indaûr rispiet ae tutele e al lavôr puartâts indenant  fin cumò ma anzit, di progredî, massime tai setôrs de presince sociâl e istituzionâl de lenghe, de comunicazion (482 e contrat di servizi Rai in primis) e chel une vore impuartant de scuele, dulà che si à di meti in vore la L.482 e la L.29, par passâ de estemporanitât ae presince dal furlan curicolâr e introdusi l’insegnament veicolâr de lenghe.
Dutis azions che a domandin, sore che un clime favorevul che – a gno parê – te societât furlane nol mancje, e a imprescj operatîfs tant che la ARLeF che a puedin lavorâ in maniere eficace, une clarece di intents e un impegn fuart dal pont di viste politic istituzionâl che fin cumò invezit  purtrop si stente a viodi, e, naturalmentri ma no dome, un jutori economic just.
O sieri fasint i miôr augûrs al gnûf consei di aministrazion che si insedie in chescj dîs: bon lavôr.
Lorenzo Fabbro
za president de arlef (agjenzie regjonâl pe lenghe furlane)