CULTURE – Liet International, Udin capitâl de musiche e dal miôr miscliç culturâl

E je stade une grande emozion viodi il teatron di Udin sglonf di int (int nostrane, ma ancje rivade di mieç continent) a celebrâ une fieste di buine musiche e di Europe, te sô acezion plui biele, chê dal miscliç di culturis, massime di chês clamadis “minoritariis” (minoritariis tai numars, forsit, ma dal sigûr no tal svant pes propriis lidrîs).
Ospitant pe prime volte la finâl dal Liet International, sabide ai 19 di Novembar, Udin al à fat un figuron, cun tante ligrie e la mirabile organizazion che e à permetût di vê sul palc 12 grups che a rivavin di dute la Europe: de Laponie ae Frisie, de Scozie al Friûl, de Asturie e dai Paîs Bas fin a dôs cuasi scognossudis regjons de Federazion Russe (la Carelie e la Udmundie).
Dominadôrs de serade – fuarts ancje di un grup numerôs di sostenidôrs, bogns di tifâ come intun stadi – a son stâts i Coffeshock Company, cravuats dal Burgenland austriac, che a àn vinçût il premi dal public e che a àn savût scjaldâ cul lôr energjic hip hop ancje l’after party. Di fat, a son lâts indenant fin aes cuatri di buinore, tirant dentri tal davoi ancje altris musiciscj e rappers furlans, come Dek Ill Ceesa e Tubet.
A vinci il prestigjôs premi de zurie, invezit, e je stade Janna Eijer de Frisie, grande vôs e grande emozion par une performance soliste al piano, une artiste pardabon di grant nivel.
Pecjât forsit par Priska, la rapresentante nostrane, che e à ben figurât cu la sô  morbinose “Hajra”, ma che forsit e à paiât un tic la responsabilitât emotive di jessi puartebandiere de lenghe di cjase.
Dut câs, une serade propit biele: nivel musicâl altissim, e dal sigûr scune par amiciziis e colaborazions, che al è pardabon un bon semenâ.
Unic neu – propit a volê fâ la secjemirindis – il fat di no vê vude, dilunc la serade, la presince des autoritâts a cjâf de promozion turistiche de regjon: tantis bielis energjiis metudis in cjamp par fâ fâ une biele figure di ospitalitât ae nestre tiere, forsit a varessin meretât une vetrinute di depliants e di prodots tipics, par aprofitâ de ocasion par fâ cognossi miôr la ricjece dal Friûl. O sin avonde sigûrs che e sedi stade dome une sviste: dal sigûr la prossime volte si fasarà cont di doprâ miôr une cussì biele oportunitât.
Margherita Timeus