Sfuei Mensîl Furlan Indipendent
Archivi de Patrie

FURLANS, DIGJITAIT FURLAN – LICÔF. Sintonizâsi su Social Friûl

Giorgio Jannis
Cemût movisi inmaniere locâl tal "grant rumôr" dal Web

Cul aparî dal web moderni, chel che i disin “web 2.0”, o vin vût ducj di rindisi cont de dibisugne di cambiâ i nestris compuartaments sul mût che vuê o podìn e o volìn jessi informâts di chel che al sucêt intal mont. La “diete mediatiche” che nô citadins o jerin usâts, componude di tv gjeneraliste, radio e gjornâi, e risultave in fin dai fats di podêle gjestîle cun facilitât: il volum limitât des informazions e des opinions sui acjadiments cuotidians che si esponevin al permeteve dut câs di cjatâ il propit ritmi, intal decidi cetant che o volevin jessi cjapâts dentri intes cjacaris dal mont.
Vuê metât dai talians, e forsit plui de metât dai furlans (la nestre Regjon e mostre de bande dai siei abitants statistichis di frecuentazion e di partecipazion al web plui altis a pet di altris Regjons) e gjave informazions e ponts di viste di internet, di chei sîts gjornalistics che a àn savût colonizâ in maniere savinte il web, inventantsi mûts gnûfs di contâ la croniche, o dai social network dulà che si iscrivìn par ricreâ lis nestris centis sociâls, la rêt relazionâl di gjenar amicâl o professionâl che ognidun di nô al costruìs intai propris spazis di socialitât online, conotant cussì la proprie identitât digjitâl.
Ma se dal sigûr Internet al à permetût pe prime volte a dute la umanitât, a dut il planet, di fâ sintî la proprie vôs inte coralitât dal web partecipatîf, tal stes timp al è rivât a furnî ai citadins struments par percepî miôr se stes intal propri esprimisi public; al è rivât a fâ in mût che lis coletivitâts che a abitin in concret i teritoris a podessin osservâsi intal lôr dâ imagjin di se intai paisaçs digjitâi.
Il ritmi, ciert, al è cambiât une vore.
O sin esponûts in maniere fisse a flus di comunicazion che a riclamin in maniere perentorie la nestre atenzion, ma il timp al è limitât e no podìn ciert cori daûr a dut. Anzit, propri la atenzion e je il ben vuê plui preziôs: ae television e ai media tradizionâi si son zontadis centenârs di fonts informativis, sîts di news, blog, lis discussions stracezornade dal sociâl network… A coventin struments par filtrâ il rumôr, par selezionâ chel che al merete pardabon la nestre atenzion, scomençant de cualitât stesse des personis che a fasin part des nestris rêts sociâls digjitâls – o par miôr dî, o vin di capî in curt cemût che al funzione Internet dal pont di viste de socialitât online –, e intune otiche ecologjiche cjapâ dentri lis particolaritâts dai diviers ambients digjitâi che o frecuentìn.
In ogni câs, di dutis lis comunitâts telematichis li che o podìn partecipâ vuê che la Rêt e à rindût trascurabil la distance gjeografiche tra lis personis, al risultarès paradossâl no restâ sintonizâts su la proprie realtât gjeografiche e teritoriâl, chê aree di pocjis desenis di chilometris di rai li che o vivìn la plui part de nestre vite e dulà che o sin cognossûts di persone.
Propit scoltant lis vôs locâls che a vegnin sù dai ambients digjitâi, doprant struments tant che Google Alert o lis funzions di ricercje di Twitter e Facebook impuestadis in maniere oportune cun peraulis clâf come “Friuli” o “Udine”, o podìn fâsi une idee tante plui articolade di ce che si fevele intes centis sociâls a nô plui dongje, di chei argoments plui bogns di movi la opinion publiche, e duncje fa il prin pas par jessi nô stes modernis Citadins 2.0.
Giorgio Jannis

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +