ATUALITÂT – Archeologjie in Friûl

Il teritori furlan al conserve inmò in dì di vuê testemoneancis impuartantis dal so passât, ancje di chel plui antîc. O lin di fat a fevelâ di un event che al à segnât un pas fondamentâl te ricercje protostoriche de nestre regjon, la vierzidure al public dal tumul funerari di S.Svualt (Udin). Vinars ai 14 di Otubar di fat e je stade inaugurade la struture che e permetarà di visitâ la sepulture in gracie a un moderni sisteme di jentrade.
CE SONO I TUMUI_ Ricuardìn che i tumui a son sepulturis de antighe ete dal Bronç, tal câs di S.Svualt o fevelìn dal 2000-1900 d.d.C., fatis sù ator dal defont in piere e glerie e che a rivavin a une altece di 4-5 m e un diametri di 25 m cirche. Pensant ai tumui a vegnin subit iniment lis tombis etruschis o i tholoi miceneus, pe lôr forme carateristiche. Ator pal Friûl si cjatin cetancj di chescj esemplis di sepulturis, ancje se in dì di vuê tancj di lôr a son stâts splanâts cence vêju studiâts prime, gjavant cussì la pussibilitât di un studi plui profont su cheste evidence archeologjiche uniche tal nestri teritori.
LA STRUTURE_ Come che si diseve la struture moderne fate sù par dâ acès ae sepulture e je stade studiade in maniere di violâ mancul pussibil il manufat e soredut di dâ la pussibilitât di visitâ la tombe come “jentrant” te stanzie dulà che si cjate il muart.
A diference des tipologjiis di tombis che si diseve prime di fat, in chês furlanis nol jere previodût un ambient interni di acès, ma ben dome il spazi par dâ acet al defont. Cumò invezit si pues viodi il cuarp, la cuvierture di glerie e ancje la stratigrafie complete dal tumul, come se si viodès un sgjâf archeologjic in cors di opare.
CUI JERIAL DENTRI?_ Il muart deponût dentri dal tumul, che si stime al sedi l’om furlan plui antîc cjatât fint cumò, al jere alt cirche 1,70 m e di 25-35 agns di etât. Dongje nol veve un furniment, se no altri di ogjets che si sedin conservâts, metût sul flanc di çampe e il cjâf bande sud-est. La datazion al Carbonio14 e à permetût di datâlu tor dal 1920 d.d.C. te fase medie de antighe ete dal Bronç.
La impuartance di cheste scuvierte e de sô musealizazion e je evidente, e lasse cetant materiâl di studi pai agns a vignî che al podarès sburtâ la ricercje archeologjiche te nestre regjon inserintle intun contest une vore ampli, parcè che o ricuardìn che tumui di cheste fate a son sparniçâts ator par dut il nestri teritori.
VISITIS VUIDADIS_ Al è za pussibil prenotâ lis visitis vuidadis clamant i Museus Civics di Udin il lunis des 10 aes 13 e des 14 aes 17 a chest numar: 0432 271767 o pûr il Studio D Friuli il martars e il joibe des 10 aes 17 al numar 346 3257139.
Venusia Dominici