LA LETARE. Si è studât il fûc dai Fogolârs

O soi Danilo Vezzio, il dean dal Fogolâr Furlan di Lyon, la vecje capitâl des Galiis. O volevi puartâ il nestri coment sul editoriâl di Dree Valcic ”Jù lis mans dai nestris emigrants”.
Ma prin o volarès ringraciâ La Patrie dal Friûl pe cualitât di chest sfuei: i articui a son pertinents, pençs, plens di sintiment e di bon sens; ancje i dissens di Di Lena a son di une grande, biele cualitât. Graciis ancje che nus mandais il sfuei in copie di cjarte che, e je vere, no si larès a cirîlu sul sît; e je cussì: cuant che al rive si lu vierç di gust, se no si lasse stâ. Compliments duncje par dut chest e… vait indenant.
La diaspore Furlane, i emigrants… Cumò al sarès forsit miôr fevelâ di furlans tal forest, ancje se nol cambie nuie, ma o varès gust che il furlan tal forest o chel di cjase al fos il stes furlan, ni plui, ni mancul… Un svuizar tal forest al è il stes svuizar te confederazion elvetiche…”Emigrants” nol sune compagn: a son detais, ma la vite e je fate di detais e la evoluzion de culture furlane e varès di valorizâ, finalmentri, la nestre int tal forest. E je ”comunicazion”, o sin dacuardi.
”Jù lis mans..”, just ! Fat ben a dîlu clâr… Ma il vêr probleme nol è chel des mans intor, e nancje di “Friuli nel Mondo” o di chês altris clapis, Efasce, Filef e v.i.: a devin jessi sîs in dut, mi pâr.
Il probleme al è che la Regjon – Nazion Friûl no je stade buine dopo passe – disìn – 60 agns, di imbastî une vere politiche pai furlans tal forest. Ce isal stât fat? Si dan un pôcs di bêçs al Ent o a chês altris associazions e che si rangjin… Chest sisteme al podeve là fin îr, vuê nol baste plui: bisugne vê il coragjo, vê la ambizion di jessi une Nazion!
Nus disin che o sin une Nazion ”cence confins”, par indurmidînus… E sarà ancje cussì, cence confins e cence struturis, cence un program, cence un obietîf, cence une vision plui in là de nape. O sin i miôr ambassadôrs dal Friûl, orpo! Cence ambassade, cence un vêr e propri assessorât o ministeri…
Lis nazion di rispiet, ancje Sant Marin, a àn une rêt – clamìnle – di consolâts, Cjamare di Cumierç, e soredut istitûts culturâls. E il Friûl? …Ma sêstu mat o ce? Ce domandistu? Sêstu fûr cu la cassele dai sintiments?
Si pues ancje capî: no sin ancjimò rivâts a insegnâ il furlan a scuele, mentri che il catalan, il breton o il cors a son materiis che si presentin ai esams di maturitât in France, che no je dal sigûr un grant esempli di ”ouverture” a chês altris culturis: par dî la veretât, a dan fastili, mâl di panze, ai sorestants francês…
Il Friûl al à – anzit scusait, al veve – almancul 200 Fogolârs, Fameis, Sot Napis: a muerin ben planc dutis, cence che la Regjon e alci un dêt… A jerin prontis a deventâ ufici comerciâl, istitût di culture o rapresentantis di une Regjon – Nazion, ma bisugne vê un pêl di coragjo e savê  cjalâ lontan par dâ dongje ideis cussì e dâ il vie…
”Ma sêstu mat, ti rindistu cont, ce vegnistu fûr cumò! Cun Tessitori, Chino Ermacora, Ottavio Valerio si lave indenant cussì! E à di lâ ancjimò! O fasìn une biele Convention, i macarons cu la salvie, Dario Zampa cun “Mandi mandi”, o cjantìn “O ce biel cjistiel a Udin” e ducj a son contents… E a tornin a cjase a cja dal diaul!”.
E i Comuns? Ce spietino par lâ a cirî la lôr int, par viodi li che e je, ce che e à fat, cemût che e podarès deventâ une puarte vierte sul mont pai zovins dal Friûl? Pensait un moment ce biel savê che ai confins dal mont il zovin al cjate cualchidun che i fevele par furlan e lu puarte ”downtown at the Company’s head office”, no a bati modon! Pensait…
A son plui di trê milions di furlans tal forest, e je vere, forsit ancje cuatri milions, ma ce Furlans sono? Sano li che al è il Friûl? Al devi jessi parsore Vignesie… Just il cont, ma chei milions li a son pierdûts pal Friûl: no mangjin nancje muset e broade!
Ce jutori àno vût de piçule Patrie par mantignî la culture furlane, ven a stâi la lenghe… No je colpe dal Ent che al fâs ce che al pues, preâ il Signôr che la Crup e tegni dûr cul contribût che se no al cole dut… Al jere scuasit bielzà colât.
Bisugne fevelâsi clâr, ai furlans di cjase no ur interesse nuie dai furlans tal forest, ”che a vegnin a sagre e che a tornin tal forest dopo la Madone di Setembar”…
Un sorestant lu à dite clâr, l’an passât a Maian; un altri sorestant, chest an lu à dite: «i Fogolârs che a son a caratar economic si puedin judâ…». Ven a stâi: se tu puartis bêçs, si pues dâti la man, se no va a fâti foti…
Il popul furlan al à bisugne di sorestants visionaris, no nome di int che e à voie di vinci lis elezion e la poltrone: bisugnave invistî su la diaspore, no lassâle murî. I zovins furlans, soredut diplomâts, no podaran mai cjatâ ducj lavôr in Friûl: la diaspore e varès judât… Pai furlans tal forest il mont al è il nestri curtîl, e la nestre cjase e jere vierte; cumò al è forsit masse tart, il fûc dai Fogolârs si è studât e o sin cence fulminants, e cence confins!
Danilo Vezzio, dean dal Fogolâr Furlan di Lyon