SPECIÂL BIBIE – La mê leture

Cussì, di prime butade o disarès: il cidinôr. Dentri dal cûr de citât, di une citât che si stave a pene a pene dismovint, jenfri i rumôrs des machinis, il sbati des puartis dal bus numar 9 e il sdrondenâ di taçutis di bar, chel cjanton li de Puritât al jere di un cinidôr potent, esplosîf.
Ti isolave di dut: come se di là dal puarton de Capele si sbregàs la dimension spazi temporâl de cuotidianitât e ogni robe, pinsîr o preocupazions a restassin fûr.
Mi presenti mieze ore prime. La siorute de Unitalsi si racomande di no lei i titui in ros, e mai scancele cu la pene. Mi senti, e o spieti il gno turni: culì mi soi inacuart che alc, in efiets, al jere diferent. Ni il criçâ dal parquet al disturbave, ni il rumôr dai sfueis. Peraulis che a rimbombavin, chês sì, dentri di un cidinôr ireâl: un segn cu la man par saludâ chei che tu cognossis, forsit cualchi peraule cisicade. Une forme di rispiet pal sacri, milenari Libri. O forsit par sens di sudizion. Spietant, i miei voi a passavin e a ripassavin la cjarte. Chi o ai di fermâmi, chi o ai di dâ cheste intonazion. O volevi che la mê leture e fos di vôs clare, cence mangjâmi lis frasis o cori masse. Che ducj a capissin, insome. E po, no volevi ingredeâmi. Ma dâi un significât che al les di là dal test, come se denant di me si podès viodi la stesse sene. Un respîr denant dal letorin. Vie. Letôr numar 913. Vanzeli di Matieu, sui “Fats di Pasche”. Oris siet e cuarante di buinore, vinars ai 8 di Avrîl. Ritirât l’atestât, o torni al fracàs de citât. Un cafè, e po a vore.
Oscar Puntel