SPECIÂL BIBIE – Une leture internazionâl in gracie de rêt

Che la Glesie Catoliche e abraçàs il creât intîr si lu capìs dal so non, in grêc “katholikòs”, vâl a dî  “universâl”. Te gnot fra i 7 e i 8 di Avrîl, o vin vude conferme di chest, stant che ancje la leture de Bibie par furlan e je stade mondiâl, in graciis de volontât dal Circul Alef di Colonia Caroya che al à partecipât ae manifestazion cun vot volontaris. Si è tratât di furlans di cuarte e di cuinte gjenerazion, dissendents di chei emigrants che 133 agns indaûr a àn fondade la gnove citât tai cjamps de provincie di Cordoba, in Argjentine. Luca Peresson, dal comitât tecnic sientific de ARLeF, e Claudio Roya, President dal Circul Alef Carojense, a àn organizât la leture par furlan e dute la regjistrazion audio e video in cinc glesiis significativis pai furlans di Argjentine.
ZACARIE A COLONIA CAROYA_ La sorprese pal auditori dal Oratori de Puritât di Udin e je rivade cuant che, al puest dal letorin, al è stât instalât un televisôrs dulà che e je stade trasmetude la leture transoceaniche. Il libri di Zacarie – dulà che a son evidents i riferiments ae lontanance de Patrie – al è stât protagonist de diferide. Zovine la scuadre dai letôrs: Diego Bovo, 32 agns, al à preparât i cjapitui 1-2 te Glesie “Nuestra Señora de Lourdes” a Sant Durí a Colonia Vicente Agüero; Marcos Goy di 17 agns al à let i cjapitui 3-4 te Capele “Nuestra Señora del Rosario” di Colonia Caroya; Daniel Cargnelutti (37 agns) al à interpretât i cjapitui 5-6 e Lito Carrizo (52 agns) chei numar 7 e 8, ducj i doi te Glesie “Nuestra Señora de Monserrat” a Colonia Caroya; Edgar Toso (49 agns) il cjapitul 9 e Mickaela Toso (16 agns) i cjapitui 10-11 te Capele di “Estancia Jesuítica de Caroya” a Colonia Caroya. I cjapitui 11 e 12 a son stâts lets di Fernando Visintin (29 agns), il 13 e il 14 di Ariel Crangnolini te Glesie “Nuestra Señora de Lourdes” a Sant Durí, a Colonia Vicente Agüero.
DISTANCIS SCURTADIS, ANCJE TRA GJENERAZIONS_ Partecipant a cheste iniziative, i furlans di Colonia Caroya a àn dimostrât che, cul jutori des gnovis tecnologjiis al è pussibil eliminâ lis distancis fisichis tra i furlans sparniçâts pal mont.
Un vore preseade dai furlans de diaspore e je stade la pussibilitât di scoltâ e di viodi dute la leture midiant dal streaming di Radio Spazio 103. Il divari digjitâl tra gjenerazions al è stât eliminât: i nevôts a impiavin il computer e i nonos si metevin sentâts a spiegâ i pas dal test sacri. La leture continue de Bibie e à rivât a fâ tornâ a cjatâ il spirt antîc dal fogolâr, cu lis fameis furlanis ator dal computer a scoltâ il libri sacri. Il calôr uman al rivave no dal fûc dai çocs ma dal calôr di une lenghe cui siei acents, cui siei tons e lis sôs peraulis…
LA CONSEGNE DAI ATESTÂTS
Tal mês di Avost, il grup folcloric “Conjuntos Alegrie” di Colonia Caroya al jere in Friûl par partecipâ al “Festival dei cuori” di Tarcint.
Tra di lôr ancje Diego Bovo e Marcos Goy che a àn partecipât a la leture de Bibie.
I doi zovins a son stâts ricevûts inte sede de ARLeF, dulà che il President Lorenzo Zanon e il component dal consei di aministrazion Christian Romanini ur àn consegnât i atestâts di partecipazion. Un al jere ancje par Claudio Roya, il regjist che al à tignût i contats pe realizazion de leture a Colonia Caroya.
Al è stât un moment di grande emozion, come che a dimostrin ancje lis declarazions lassadis dai doi letôrs: «Al è stât par nô un onôr podê rapresentâ i furlans tal forest in chest event cussì preseôs pe culture e pe religjon, dant cun di plui un risalt fuart ae iniziative. Cun di plui, nus à permetût di vignî in Friûl, cognossint in maniere direte il teritori. Sperìn di tornâ in curt» al à dit Marcos plen di sperance.
Diego al à tornât a marcâ: «O soi stât contenton di cjapâ part ae leture parcè che dut chel che al inten la culture furlane e il furlan mi interesse: a pene che mi si fevele di furlan e Friûl o soi entusiast!»
Daniele Martina