ATUALITÂT – IL SIVILOT. Nazionalitaris e infrastruturis

Cui lu varessial mai dite, che si veve di passâ pe Tav e pal puart di Triest par scuvierzi lis tindincis nazionalitariis di Tondo e de Serracchiani… Ce isal sucedût? In primis, che a àn fat barufe e za di chi o vin savût des influencis celtichis sul president cuant che al à dite che la Serracchiani e veve “gufât” cuintri lis grandis oparis in regjon. Cui, se no la civuite, rapresentie miôr il misteri dal bosc, dai druits che ancjemò a son ator pai bosc de Cjargne? In sumis, Tondo al pense ae segretarie dal Pd tant che a une agane, simpri pronte a dâi cuintri cui striaments.
E po dopo, un suston leghist cuant che le à clamade “romane traplantade in Friûl”. Cemût, president, no sino ducj talians? O forsit, se cualchidun al è furlan al è diviers di un roman, di un milanês o di napoletan? Ocjo, che il passaç a definî i furlans e sarès la logjiche conseguence dal resonament, ma no pretindìn tant.
Di bande sô, chê puarine de Debora no je stade cidine e i à rispuindût daurman pes rimis: “Cualchidun al podarès scrupulâ che il cjargnel Tondo si podarès disinteressâ dai puarts di Triest e di Monfalcon”.
O vês let ben: “cjargnel”. Ma no dome. E sotintint che jessi cjargnel naturalmentri al vûl dî lâ cuintri Triest. Gruesse cheste, par une che de unitât regjonâl e fâs dogme di veretât e di fede.
O viodês duncje che cuant che si inrabiisi e salte fûr la veretât, ce che si pense dentri pardabon e no ce che al comande il partît o la ideologjie.
Tondo al pense che un roman che al rive in Friûl al sedi un traplantât, la Serracchiani che un furlan al sedi par nature cuintri Triest.
Doi plui doi a fasin cuatri: Tondo e la Serracchiani a son doi furlaniscj, ma no lu san. E che nissun, pal amôr di Diu, al ledi a disiural. O sin za masse.
L’OM DI BURI