FURLANS, DIGJITAIT FURLAN – E-MARILENGHE. Il gnûf e-fogolâr dal Istitût Tellini

Daspò di une lungje spiete, l’Istitût pe Ricercje e la Promozion de Civiltât Furlane “Achille Tellini” al à di pôc taiade la curdele dal so gnûf sît, che al pues jessi cjatât ae direzion www.istitutoachilletellini.org.
De prime voglade si capìs che il timp investît su chestis pagjinis nol è stât straçât.
La cjase dal Tellini si la pues gjoldi par furlan, talian o inglês: la stesse sielte di dutis lis publicazions di cheste associazion, che a son dutis almancul bilengâls.
Di ce che a contin lis peraulis di benvignût dal president Gigi Geromet, pontâ sui gnûfs media al è il program di cheste istituzion, une sielte fondamentâl par svicinâ lis gnovis gjenerazions a la sioretât de nestre ereditât culturâl. L’obietîf didatic al è chel di ponte par dut il lavôr che tai agns al è stât partant indenant dal Tellini, direzint lis energjiis no dome su la cjarte stampade, ma inmaneant, par fâ un esempli, un festival bienâl di curtmetraçs.
La linie di stîl dal gnûf sît, opare di Fabio Dreosso, e je frescje e nete, su lis tonalitâts fredis dal blu cun detais zâi par riclamâ la bandiere furlane e une grafiche no invasive par lassâi impuartance ai tescj.
Il contignût al è daûr jessi zontât dì par dì, ma la pagjine di benvignût nus ufrìs inzornaments su lis ultimis ativitâts e sui prossins apontaments. Daspò si puedin cjatâ lis informazions sul Istitût, su la sô storie, sui siei vot dipartiments di ricjerce sientifiche e artistiche, cun di plui si cjate ancje alc sul personaç Achille Tellini, che i da il non a chest grup.
In zonte, o vin la liste organizade des publicazions, scomençant de cognossude golaine “Mîts, Flabis e Liendis dal Friûl storic”, ferâl che i à dât vite al Istitût e opare fondamentâl pal nestri patrimoni culturâl e etnografic che i ricjerçadôrs a puartin indevant cjapant sù lis contis de tradizion lant pardabon cjase par cjase, paîs par paîs, in dutis lis areis de nestre patrie par daspò disvilupâlis a nivel sientific.
Cul so sît, cheste associazion no dome e cîr di fâ sù un puint dal fogolâr, chel vêr, a chel gnûf, ven a stâi la rêt, ma ancje di fâsi cognossi dant une scjasse al prejudizi de furlanetât come valôr dome folkloristic o di basse cualitât.
Michele Calligaris