CULTURE – LA FABRICHE DAI… LIBRIS. Cirtint lis olmis di Diu, vol. 5

Glesie Furlane e continue la opare di publicazion e divulgazion dai scrits di pre Antoni Beline e a la fin dal 2010 al è jessût il volum di “Cirint lis olmis di Diu 5” che al jere il titul de rubriche firmade par agns su la Vita Cattolica.
E la prefazion di chest cuinti volum e je firmade di bons. Duili Corgnali che par agns al è stât diretôr dal setemanâl diocesan e che al à il mert di vê concuardât cun pre Antoni cheste colaborazion.
Tal so intervent bons. Corgnali al analize il valôr de opare di pre Antoni e dai siei scrits, ma nus conte ancje cualchi particolâr di chest rapuart, fecont dal pont di viste leterari e gjornalistic, ma che al veve puartât ancje a cualchi tension come che si pues intuî tes peraulis dal diretôr di in chê volte «E scomençà cheste venture» al scrîf bons. Corgnali «La spiete no fo malapaiade. Pre Toni al scrivè pagjinis e pagjinis di grande leterature e culture furlane. Al fo ancje avonde leâl seont il pat. Dome cualchi volte, forsit ancje pal so spirt provocatori che al voleve provinâ la tignude dal diretôr, al mandave cualchi scrit, da râr par altri, dulà che al lave fûr dal concordi, che al veve metûts dome doi tres: no scrivi cuintri di predis vivents e no scrivi cuintri de Glesie».
Fin chi la posizion di bons. Corgnali… al sarès stât biel scoltâ un contraditori par cognossi ancje ce che al varès rispuindût pre Antoni, ma forsit nol vâl la pene pierdisi ta chestis domandis, savint che tantis rispuestis si puedin cjatâ tai tancj articui che cheste publicazion e presente e dulà che, par dîle cun bons. Corgnali, al ven fûr un pre Beline «profete che al cîr une lûs tal scûr di chest mont. Politiche, societât, religjon, glesie e int a son i protagoniscj des riflessions dal nestri. E in dutis lis pagjinis si nûl il profum di un pinsîr libar, dispès conturbât ma cence malizie. E simpri un amôr fedêl al popul furlan e a la sô storie».
Christian Romanini