TERITORIS – OMS DI LIBERTÂT. Gwynfor Evans, la vitorie de determinazion (Gales)

Tra i oms che si son batûts pe libertât dal Gales, il plui innomenât al è dal sigûr Owain Glyndwˆr (che sul imprin dal ‘400 al à vuidât une vuerilie che e à liberât une buine fete dal paîs dal jôf inglês), ma a ‘nd è almancul un altri che al à savût concuistâsi un puest impuartant intal cûr dai galês, ven a dî Gwynfor Evans (1912 – 2005).
Ancjemò impegnât intai studis di avocat, al veve metût sù a Oxford une sezion dal Plaid Cymru, il partît nazionalist galês a pene nassût. Tai agns seguitîfs si veve dedicât a fâ cressi chest partît, prime come militant e po, par passe trente agns, tant che president. Al jere stât lui a vuidâlu tes primis vitoriis e al jere stât il prin dal Plaid Cymru elet intal Parlament britanic (1966).
Pacifist convint, Evans si veve impegnât in diviersis bataiis no violentis in difese dal Gales. La sô determinazion e veve puartât il guvier di Margaret Thatcher a tornâ sui siei pas e a meti in pîts intal 1982 la prime television in lenghe galese: S4C. Il so impegn al è stât fondamentâl ancje par rivâ aes primis leçs di politiche linguistiche pal galês: un mert che i è stât ricognossût ancje dai siei aversaris politics.
In dì di vuê, il numar di personis che a fevelin par galês al è tornât a cressi. Cheste inversion e je fie de politiche linguistiche metude in at in Gales tai ultins 30 agns e otignude cul impegn dai militants e cun mobilitazions popolârs. Se dut chest impegn si pues strucâlu intun non, i galês no àn dubis tal dî che è chel di Gwynfor Evans.
CARLI PUP