ATUALITÂT – Mieze plene o mieze vueide?

Se si le cjale de bande de mancjance di un moviment politic autonomist, la tace e je dal sigûr mieze vueide.
E je invezit mieze plene se si le cjale de bande des concuistis che a son stadis fatis tai agns indaûr dal moviment popolâr, in part autonomist: Universitât dal Friûl, leçs di tutele dal furlan statâls e regjonâls, imprescj di comunicazion (in particolâr Radio Onde Furlane), e chest par fevelâ dome des concuistis plui evidentis (ma, par vê un cuadri plui complet, si varès di fevelâ ancje de largje produzion culturâl, de editorie, de musiche, dal teatri). Autolesionist mi somee duncje il segretari dal Moviment Friûl Marc De Agostini (viôt l’intervent su la Patrie dal Friûl 01-02 dal 2011, Zenâr-Fevrâr, ndr) che al preferìs lamentâsi che i furlans no àn capît o volût avonde il MF invezi di gjoldi dal fat che dutis lis concuistis che o ai dit a son, almancul in part, il frut de bataie dal MF. No dome dal MF, parcè che o varessin di cjapâ dentri ancje lis tantis espressions associativis che si son pandudis intai agns stâts e i esponents “autonomiscj” di altris fuarcis politichis, tant che Silvana Schiavi o Arnalt Baracetti, tant par fâ doi nons. Il pont di riferiment, volontari e involontari, al è stât in dut câs l’MF.
Si podarès se mai domandâsi parcè che l’MF al è lât al mancul e parcè che no je nassude nissune altre fuarce autonomiste di un ciert pês.
La rispueste e je dople. Di une bande, l’autonomisim al à puartât a cjase cuasi dut ce che si jere proponût: la modernizazion de regjon (ancje se no simpri e no dute e je stade biele come che si spietavisi), la fin des sclavitûts militârs, la universitât, la tutele de lenghe. E je restade fûr dome la separazion di Triest, ma cheste bataie e je muarte di vecjaie parcè che a un ciert pont si à capît che a dinissun i coventave lâ a Triest par une pratiche, sedi par vie che al jere rivât Internet, sedi parcè che la modernizazion e veve puartât vie ancje a Triest i centris decisionâi des grandis impresis.
Di chê altre bande, si pues dî che une cierte dose di autonomisim e vedi travanât ducj i partîts, cui plui cui mancul. Nol è dal sigûr un câs che tancj ex MF a sedin finîts in chê Leghe che e à supât plui di cualchidun dai temis autonomiscj. Ancjemò plui scjassôs al è il fat che la leç regjonâl sul furlan e sedi stade fate di une Zonte regjonâl di centri çampe, che e à ancje viert i cordons de borse dal sigûr di plui di ce che e à fat, almancul fin cumò, chê di centri drete.
In conclusion, si podarès dî che no vin un moviment politic autonomist parcè i obietîfs dal vecjo autonomisim a son stâts concuistâts e nissun, fin cumò, al à vût il cjâf, o la fuarce, o il cûr di proponi obietîfs che a puartedin un scjalin plui in sù la bataie pe autodeterminazion.
Chel che al podarès mancjâ, duncje, al è un partît nazionalitari che al organizedi la cussience nazionâl furlane, là che si pant, e che al lavori par fâle vignî a chei che no le àn. Un partît che al varès di jessi fat massime di zovins che a vedin la pazience e il timp par imbastî un lavôr a lunc tiermin: ju vino? E chei che a son, trop sono interessâts (e convints) che chê de separazion o de indipendence e sedi la strade che ti permetarès di difindi miôr la tô identitât?
Chê altre strade par fâ lâ indevant lis bataiis e je chê movimentiste. Il Friûl al è une vore siôr di espressions associativis peadis cul teritori e in potence identitariis (grups, comitâts, associazions, circui). Si varès di cjatâ la maniere di metilis adun intune sorte di societât di socors mutuâl, di mût che cuant che al covente, si fasedi pesâ dute la fuarce che si à. Une rêt, in sumis, che e dopredi la Rêt par tignîsi dongje e fâ zirâ lis ideis.
Mauro Tosoni