Sfuei Mensîl Furlan Indipendent
Archivi de Patrie

VIERZIDURE – La lungje gjestazion dal regolament

............

A son 68 mil i students che a podaressin frecuentâ ativitâts didatichis par furlan dal an che al ven dome intes scuelis statâls: e 9 mil a podaressin zontâsi intes scuelis paritaris. Chest se al larà in vore il regolament prontât di pueste, dât bon inte sô version preliminâr de zonte regjonâl. Al varès di jessi un moment storic, che al fâs mudâ in realtât i siums di tancj furlans che a àn lotât pe lôr identitât. Tal 1980 Zuanfran D’Aronc al diseve intun articul po dopo ripuartât tes sôs “Pagjinis furlanis” che “za aromai il Friûl al à un so sisteme scolastic speciâl. E al podarès jessilu ancjemò di plui se i vignìs ricognossude al furlan dignitât di lenghe”. E tal 2001 Glesie Furlane e fasè vignî fûr “Une scuele pai furlans”, un libri di pre Toni Beline, dome profetic inte sô nete clarece: tal Avrîl dal 2007 la Comission di Savis metude su dal ARLeF par prontâ i obietîfs didatics dal insegnament in lenghe furlane e veve burît fûr une propueste pal insegnament dal furlan inte nestre regjon.
ILUSIONS_ Bisugnarès fâ fieste, duncje, ma l’aiar che al tire nol è chel. In veretât la gjestazion di chest regolament al veve di messedâ adun lis resons didatichis di une bande, i aspiets legjislatîfs e aministratîfs di chê altre. E cussì, dongje dal contribût dai uficis regjonâi, ur jere stât domandât a une Comission di tecnics vuidade dal dotôr Bruno Forte di imbastî un regolament che al fos il plui funzionâl pussibil aes dibisugnis dai operadôrs de scuele e dai siei arlêfs. Cheste Comission e da dongje il miôr dai esperts furlans de didatiche in marilenghe intes scuelis, e e à lavorât di un an incà: la prime sentade si è davuelte tal mês di Lui di un an fa. I prins a jessi contents de aprovazion dal regolament a varessin di jessi lôr, ma nol è cussì: se si cîr di fevelâ cun cualchidun di lôr, la rispueste cortese che ti dan si podarès definî par inglês “no comment”. Dome Forte al zonte alc: «o varessin volût un imprest mancul burocratic e plui atent ae didatiche. Si viôt che la volontât politiche di puartâ indevant discors di cheste fate – al siere – forsit no je».
DELUSION_ Il parcè di cheste delusion dai Comissaris si lu spieghe intun lamp. La Comission no si ricognòs intal lavôr che al è stât prontât de Regjon, che al ten cont dome in minime part dal prodot de sô ativitât: a un ciert pont la boze di regolament dai Savis e je finide intai landris de burocrazie regjonâl, dulà che al è vignût fûr un test dal dut difarent, e svuedât di ogni inovazion. Soredut ce che al rivuardave i temis tant che la educazion plurilengâl integrade, la professionalitât dai docents e la valorizazion des esperiencis plui impuartantis puartadis indevant fin cumò par ce che al inten la marilenghe al è sparît o al è stât ridot a pocje robe. A chest pont la Comission e veve dôs stradis: o pandi publichementri il sô marum, o cirî di dreçâ ce che al reste di dreçabil a partî de definizion dai titui di chei che a varan di lâ a insegnâ la marilenghe. In chest moment la definizion no je clare, ma l’orientament dai Comissaris al è chel di cirî di fâ jentrâ inte liste dome int competente, cence lassâ discrezionalitât a ents (tant che l’Ufici Scolastic Regjonâl, ndr) che in materie fin cumò no àn tignût il furlan in grande considerazion – ancje se la plui part des fameis furlanis e domande il so insegnament.
La Comission, cun sens di responsabilitât, e à ritignût di no fâ declarazions publichis e di mantignî in vore il sô rûl di orghin tecnic: dome il timp al disarà se cheste e sarà la sielte juste, e se intal regolament definitîf a vignaran tignudis buinis lis indicazions di chei che a cognossin la scuele furlane come lis lôr sachetis, o se invezit a saran i uficis di Triest a decidi cemût che si à di imparâ la marilenghe. In cheste vicende, dut câs, une robe si viôt clare: la Regjon, che in materie di scuele e à vût tal 2001 la competence di bande dal Stât cu la riforme dal titul V de costituzion, no à nissune voie di esercitâle creant une “scuele speciâl” degne di une “regjon speciâl”. Pecjât.
Walter Tomada

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +