ATUALITÂT – Il Friûl in Champions League

“Cucù, Triestine cjalinus par TV”: ancje un pocje di sane ironie e à saludât la concuiste de Europe di bande de scuadre di Francesco Guidolin. L’Udin, dopo 5 agns e cun 90 minûts dulà che Totò Di Natale, pe seconde volte di file prin goleador dal campionât al à rivât a sbaliâ ancje un rigôr, al torne in Champions League, il torneu plui impuartant dal Vecjo Continent.
E no nus interesse che pal moment si vedi di frontâ i “preliminârs”, che, simpri il solit tifôs furlan ironic in curve al ricuardave tun cartel “I preliminârs a son impuartants!”
“Stin calmuts!” al veve comentât par furlan mister Guidolin cuant che l’entusiasim al steve cjapant masse pît e l’Udin al veve rivât sot de prime de classifiche cualchi zornade prime de fin dal campionât.
Di bon “tipichementri furlan”, ancje se di adozion (al è di Castelfranco Veneto), nol veve voie che a la scuadre i vignìs inzirli. E chest caratar cuasit un tic ors, ma che in realtât al palese dome une grande serietât, i à permetût di concuistâ un travuart che cjalant lis primis di campionât cuntun filot di sconfitis plui di cualchidun al veve za sbandonât.
Par furtune no la scuadre che di cualchi an e à leât la sô ativitât e la sô identitât inmò di plui cul teritori. Zuiadôrs nassûts in Patrie no ‘nd è za di un biel toc, ma cemût no ricognossi tant che furlans Giampiero Pinzi che dopo de fin de ultime partide al cor braurôs a cjoli une bandiere dal Friûl e le puarte trionfant ator pal cjamp; o Gökhan Inler che ancje vie pe fieste in place Libertât al scherce fevelant par furlan cu la gjornaliste Francesca Spangaro; o i diviers zuiadôrs che a saludi cuntun “Mandi!” e il paron Pozzo che cjapât dal entusiasim al tache a cjantâ la mitiche cjançon di Dario Zampa “Alè Udin”?
Dome cualchi esempli di une filosofie di societât uficializade ancje cul acuardi firmât dal President Franco Soldati cu la Agjenzie regjonâl pe lenghe furlane, cun tant di comunicazion istituzionâl propit par furlan, su la ande di un plui innomenât esempli tant che il Barcelona FC (fresc vincidôr de Cope dai Campions, juste cualchi zornade dopo de cualificazion dal Udin).
Ma il Friûl di Champions nol è dome Udin, parcè che ancje lis feminis dal Tavagnà, di agns te prime categorie taliane e je rivade a concuistâ chest travuart, realizant cussì une biele doplete furlane.
E cumò, ducj, oms e feminis, cu la bandiere di Bertrant ator pai cjamps de Europe!
Redazion