ATUALITÂT – Ai 22 di Mai: inaugurazion de mostre di Dieç

Une biele zornade di Mai: tal teatri tende di Dieç al è stât fat il licôf ae mostre dedicade al teme che di simpri al à puartât e al puarte l’om a metisi in discussion, a fâsi domandis, ven a stâi “Aldilà – L’ultimo mistero ad essere svelato”. Presint ae manifestazion, dongje di une buine rapresentance di autoritâts politichis e religjosis, ancje tante int (cirche 400 personis).
Intant che il Coro dal Friûl–V.J. e la Orchestre Friûl–V.J. Mitteleurope a spandin pal aiar lis lôr melodiis, te latarie subite dongje lis feminis a puartin il lat. La vite dal paisut e va indevant e cussì mi soi lassade cjapâ la man e, lant pes viis di Dieç, mi à plasût fermâ un pôcs di Dieçans par sintî lis lôr impressions su chest grant event.
“La mostre e je une difusion di fede. E je une catechesi par grancj – al dîs Giacomino Iob – e une maniere par fâ cognossi il vanzeli.”
“E je une esperience che ti fâs cressi – cussì e conte Lara, une des responsabilis de mostre –. O ai tacât che o vevi 18 agns, cu la prime mostre tal 2004. La mostre e cjape dentri un grum di int, di volontaris soredut dal puest e e à cambiât il paîs. Prin al jere un paîs isolât, sierât in se stes. Cumò ancje i dieçans a àn tacât a capî la impuartance di vê une mostre di chest nivel intal paîs. L’an passât a son stadis cirche 28.000 personis, l’an prin 25.000. Il visitadôr tipic al à une etât di cirche 50-60 agns, ancje se al è di dî che intai ultins agns si à viodût une presince, ancje se minime, di zovins. Di là de mostre, si podin fâ altris robis: viodi la plêf di Sant Florean, i mulins di Dieç, fermâsi a mangjâ i prodots tipics.”
“La mostre e pues judâ a dâ une man ae economie dal paîs – mi conte la siore dal bar centrâl –. Intai agns si à podût viodi un ciert moviment di int.”
Ancje Firmino, che al masane farine tal mulin a aghe, al dîs compagn e al zonte ancje che “Si spietarès une continuazion. Achì bisugnarès pensâ di svilupâ altris servizis e struturis, par esempli l’albierc difondût.”
“Il zîr di int al è soredut di zornade – a contin tal albierc di Dieç –. Al tocjarès meti a puest i trois, al volarès sistemât il paîs, ancje achì sore in Lunze cussì la int che e ven e podarès restâ cualchi dì di plui.”
No ai cjacarât de mostre, ma par chê ognidun al pues fâ un salt, considerât che e reste vierte fin ai 30 di Otubar, dal martars ae sabide cun orari 10-19 e la domenie 9.30-19.30. Par informazions: 0433/44445 o 0433/2054 –  www.illegio.it
Marta Vezzi