Blogarins de diaspore

Un spazi pai Furlans fûr dal Friûl, par contâ il mont viodût cui voi di chei che a son ator pal mont … “Cun chest sito o vorès fa’ cognossi e cognossi les realtâts che esistin ator pal mont, contadis cun peraulis furlanis”, cussì Norman, furlan che al è a stâ tai Stâts Unîts, al descrîf lis finalitâts dal so gnûf blog, Furlans de diaspore (http://furlans.blogspot.com/), che al puarte il sottitul une vore significatîf “Les vôs dai Furlans sparniçâts ator pal mont”. Un blog viert a ducj chei che, stant fûr, a viodin, cun voi di Furlans, realtâts difarentis e che a vuelin contâlis, in marilenghe. Il blog, screât a Jugn di chest an, ma za une vore siôr di contribûts e di leams, une vore curât e cuntune grafiche sclete, ma cetant ben fate, al è viert a contribûts di culture, societât, ambient, a impressions e opinions par – cemût che al dîs Norman stes – fâ cognossi, ma ancje salacor cognossi miôr e plui a font, il mont che o viodìn, di fûr de Patrie. Il blog al vûl jessi caraterizât di une pluralitât di vôs e rapresentâ la vivarose e une vore sparniçade realtât dai Furlans dal e tal mont; al vûl jessi une rêt, un network dai tancj emigrâts o nassûts tal forest, che si cjatin a vivi “in jenfri a doi monts”, cemût che al scrîf Norman intun dai sei posts, jenfri il mont de lôr vite cuotidiane e il Friûl, viodût di lontan, ma vivût ancje di dongje, intes tantis ocasions di visite. Furlans che salacor si sintin a cjase – ma ancje migrants – in ducj doi i monts.