Il premi S. Simon dal comun di Codroip chest an nol è stât assegnât.
La jurie e à decidût cussì. E à segnalât une opare, chê di Paolo Monte “Contis di un di Torse”, ma il premi no lu à assegnât.
Inte serade dai 28 di Otubar, li de sale consiliâr dal comun, l’autôr al à let un pâr di tocs de sô vore. Si trate di une rieste di personaçs dal so paîs, Torse. Personaçs di une altre ete, di une altre culture, di une altre umanitât, ancje se si fevele di no plui 40-50 agns in daûr.
Scoltant chês storiis, si à podût ancje capî la motivazion de decision de jurie (Franca Mainardis, Mario Turello, Carlo Tolazzi, Aldo Colonnello e Giacomo Vit).
A son storiis bielis, fatis par plasê e che a plasin. E alore? E alore a àn il difiet di cjalâ indaûr. Di fevelâ di un Friûl che nol è plui.
La jurie dal S. Simon no riten di vê dome il rûl di judicâ la valence intrinsiche di une vore, di une conte lungje, di un romanç curt o ben di une racuelte di contis che e sedi. Ma ancje chel di scrutinâ il mont des letaris furlanis, par capî di cuale bande che a van. E se a van dome viers dal passât, nol è dificil pronosticâ che no varan un avignî.
Il S. Simon al è nassût intal 1980: cheste e je duncje la vincjesime novesime edizion. Nol è stât assegnât cuatri voltis (1989, 1991, 2005 e 2008). No mi pâr che a sedin tantonis. E no mi pâr nancje che il fat di no assegnâlu al sedi negatîf. Al vûl dî che lis variis juriis no jerin propi di bocje facile, vâl a dî che a pretindevin oparis di cualitât e no davin il premi tant par dâlu. Chest al vûl dî serietât.
Sul fat dal cjalâ indaûr, bisugne intindisi. Intindìnsi cuntun esempli.
La miôr opare di dute la leterature teatrâl furlane, “I turcs tal Friûl” di Pier Pauli Pasolini, e je dal 1944, ma e fevele di fats sucedûts intal 1499. E pûr e je une opare moderne, anzit, di plui, e je une grande opare e al impuarte propit pôc se e je moderne o no moderne. Par jessi modernis, no par fuarce bisugne fevelâ di internet e di telefonins.
Ma la preocupazion de jurie e je une altre. Se la leterature furlane e va dilunc a cjalâ al passât, a la stale e al cjar dal fen, ben, al è fatâl che il so destin al sedi chel di restâ sterpe e cence avignî.
Vere e je ancje che, se o lassìn di bande il discors de poesie che e à dut un altri status, il Friûl al samee dismovisi cumò ae prose leterarie. Il prin romanç furlan al è dal 1957 (“La aghe da pît la cleve” di Dino Virgili 1925-1983). E, cuntune sorte di voie di recuperâ il teren pierdût, si è metût a scrivi. Tant, magari masse, ancje in graciis dal fat che, pe prime volte, cuatri carantans di finanziaments cumò si cjatiju. Tant e no simpri ben. Trops libruts no sono saltâts fûr des scuelis, des associazions culturâls, des aministrazions cence masse cure de grafie, de coretece, de forme, propit in cheste fase di cressite e di fissazion di une lenghe standard!
Ma, e fâs capî la jurie, ce che al mancje e je la cualitât. E si capìs che se al nassès un Shakespeare chenti, a saressin ducj contents!
Ma, cjalant la tabele des oparis premiadis dilunc vie, dal 1980 in ca, ben, in sumis, no mi pâr che la cualitât e mancji propit dal dut. A son 32 libris, gjavant traduzions e saçs, la narative e rive a 26, cualchidune dignitose, cualchi altre biele, cualchidune une vore biele.
E po il S. Simon nol esaurìs dute la produzion in prose furlane. Par esempli, se la riviste “La comugne” e podès saltâ fûr cun continuitât, e podarès puartâ indevant chel rignuviment che al samee mancjâ.
Par ultin, no stin dismenteâ che o sin 500-600 mil a fevelâ cheste lenghe. E je ancje une cuestion di numars!
Vere che 6.000 graolês a àn produsût Blâs Marin e che nô, il nestri plui grant poete, o vin scugnût adotâlu (Pasolini nol jere propit furlan…).
Ma, salacor, la buine prose, la buine leterature, e à dibisugne di un sostrât di mediocritât, di une largje stiernidure par poiâsi parsore. E magari intal mieç di tancj scartins al saltarà fûr il cap di opare.
Laurin Zuan Nardin
Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.
Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +
Gnovis / A tornin a jessi in volum li “LETARIS AI FURLANS” di Pre Bepo Marchet
Redazion
Une biele gnove pe nestre int! A tornin a jessi in volum li “LETARIS AI FURLANS” di Pre Bepo Marchet Intune edizion curade e comentade di Davide Turello, a saran presentadis MIERCUS AI 3 DI AVRÎL aes 5 e mieze sot sere inte sale consiliâr dal Comun di Glemone No stei a mancjâ! Us spietìn! […] lei di plui +
Gnovis / Ae presentazions dal libri “Feminis furlanis fuartis”, cetant public! Graziis
Redazion
Te seste edizion de rasegne “Quando le Donne” curade da la Aministrazion Comunâl di Romans, cu la autore, Walter Tomada, diretôr de “La Patrie dal Friûl”. A Cormons ur daran acet i Amîs da Mont Quarine, cu la autore a son intervignûde Roberta Nunin, professoresse ordenarie di Dirit dal lavôr ae Universitât di Triest, e Carlotta Del Bianco, […] lei di plui +
Rassegne stampe / Articul dal Messaggero Veneto dai 15-3-2024 su la presentazion dal nestri libri “Feminis Furlanis Fuartis” di Erika Adami
RedazionL'EDITORIAL / Preâ par furlan al è onôr e no pecjât
Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +
Gnovis / Acuile sportive furlane
Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +