CULTURE. Gnovis nominis pe ARLeF

A son stâts nominâts i gnûfs rapresentants de Regjon intal consei di aministrazion de ARLeF, la Agjenzie regjonâl pe lenghe furlane.
La gnove Zonte regjonâl, su propueste dal assessôr ae Istruzion e Culture, Roberto Molinaro, e à di fat indicât ae presidence Lorenzo Zanon, vice-president dal Istitût Ladin Furlan “Pre Checo Placerean”, e components dal consei di aministrazion Paolo Paron, Simone Bressan, Fabiana Castellarin e Vittorio Zanon.
Il president de Provincie di Udin, Pietro Fontanini, al à designât tant che rapresentant dal so ent Christian Romanini, vice-diretôr dal nestri gjornâl. Pe provincie di Gurize Barbara Macor e reste in cjarie fint al 2011 e pe provincie di Pordenon Lucio Roncali al reste in cjarie fint al 2009 (ven a dî fint a la scjadince dal mandât dai ents che ju àn nomenâts, ndr). Il gnûf Cda al jentrarà in plen servizi dopo de nomine dal component in rapresentance de Anci (che inmò al mancje) e dopo dal decret che al varà di firmâ il President de Regjon Renzo Tondo.
Po dopo il gnûf Cda al nomenarà i comoponents dal Comitât Sientific dal ent, che al è l’organisim che al varà di determinâ in concret la politiche linguistiche dal ent, sot de direzion economiche e organizative dal Consei apene elet.
Redazion
O fâs a non gno e di dute la clape «Patrie dal Friûl» un grant auguri di bon lavôr a ducj i neo nominâts e soredut a Simone Bressan e Christian Romanini, colaboradôrs dal nestri sfuei. O sin soredut contents che a sedin doi zovins. Ancje par vie di chest incaric, Christian Romanini al è stât nomenât vicediretôr -rûl meretât par vie dal so lavôr in chescj agns, ma plui di rapresentance – stant che i impegns no i permetin plui di jessi presint come prime daûr dal lavôr de redazion. Al ven sostituît tal incaric di cjâf redatôr di Alessio Potocco. Chest al è un altri motîf di braure pal nestri gjornâl: Alessio al è un dai trê furlans (par cumò) che a àn fat l’esam di Stât pe cualifiche di gjornalist professionist in marilenghe.
Dree Venier