Sfuei Mensîl Furlan Indipendent
Archivi de Patrie

CULTURE. INTERVISTE – Remo Cacitti: De ricostruzion di Vençon… ae costruzion di une religjon

............

Remo
Une volte laureât, o pensavi di tornâ a insegnâ in Friûl, no ai mai vude chê di fermâmi a Milan.

Remo Cacitti, natîf di Tumieç, al insegne ae “Statâl” di Milan. Cun lui o vin fevelât dal libri fat cun Augias “Inchiesta sul cristianesimo. Come si costruisce una religione“, ma ancje de sô passion pal Friûl che i è simpri leât: fra lis altris robis al è un membri di Glesie Furlane
Prof Cacitti, “docente di Letteratura cristiana antica e Storia del cristianesimo antico all’Università degli Studi di Milano”, ma di origjin cjargnele. I Cacit a son di Tumieç: cemût isal rivât a Milan?
Jo o soi nassût a Tumieç, ma gno pari al jere tal esercit e duncje o vin zirât un tic dut il Friûl, fintant che si sin stabilîts a Vençon, li che e je la cjase di famee. O ai fat il liceu classic a Udin e dopo o soi lât a studiâ ae Catoliche di Milan. Gno pari al veve plasê che o studiassin, e duncje mi à simpri incoragjât. Bisugne ancje dî che no ai mai pesât tant sui conts de famee, parcè che o rivavi simpri a otignî la borse di studi.
Une volte laureât, o pensavi di tornâ a insegnâ in Friûl, no ai mai vude chê di fermâmi a Milan. O vevi ancje otignût une suplence in Cjargne cuant che, tal Novembar dal 1971, la Universitât mi à clamât e o soi restât a Milan fin cumò…
Però il leam cul Friûl no lu à mai molât, lui al fâs part ancje di Glesie Furlane. Cemût isal jentrât te socie?
Al è sucedût chê volte dal taramot, sburt di rignuviment ancje culturâl par nô furlans. Jo o ai fat part dal grup che si è batût – cuintri ducj! – par tornâ a fâ sù Vençon come che e je cumò, rispietant la disposizion antighe. E Glesie Furlane e jere coinvolzude ad in plen te operazion. In particolâr, o vin fate la ricostruzion par anastilosi (piere par piere, ndr) dal Domo: 4000 pieris metudis tal puest precîs di prime. Une operazion titaniche che nol crodeve nissun che o saressin stâts bogns di fâ.
Il libri fat cun Corrado Augias
Il libri fat cun Corrado Augias

Cemût ise nassude la colaborazion cun Augias?
Mi veve invidât a une pontade de sô trasmission, parcè che al veve cualchi gno studi. E je nassude une simpatie, di fat mi à invidât une altre volte in trasmission. Infin, mi à clamât cu la idee di chest libri.
A proposit dal libri, prin di dut la domande classiche: Jesù isal esistût pardabon?
Nol è nissun dubi che al sedi esistût: a esistin testemoneancis fûr dal cristianisim, e je une cuestion esauride za de fin dal Votcent.
Cemût considerâ dutis lis varis liendis che lu disin maridât, sapulît tal Kashmir, e par ultimis chês metudis tal film “The Da Vinci Code” (“Il Codiç Da Vinci”)?
Su la sô vite no vin nuie di sigûr: i Vanzelis a son un anunci, no libris storics. In chê volte, un fantat judeu che dopo dai vincj agns no si maridave al vignive convocât dal rabin: e jere une robe strane, insome. Si stave slargjant, però, la aseticitât, massime te comunitât judee dai Esseni. Pensìn ancje ae figure di Giovanni il Battista. Facil che al podeve jessi stât no maridât, duncje. Pal rest des contis che si sintin, stant che no si san grandis robis de sô vite, chest si preste aes invenzions plui varis.
Cemût nassie une religjon, o come che al è scrit tal sottitul dal libri, cemût che “si costruìs”?
Achì bisugne fâ une precise distinzion par no confondi i doi tiermins: la nassite de religjon cristiane e je dade de resurezion di Jesù Crist; la costruzion e je l’agjî uman di conseguence di bande di chei che a àn fede te resurezion. Par spiegâi miôr il concet o doprarai un esempli che o fâs cui miei arlêfs. Cuant che un si inamore, nol è pussibil regjistrâ l’inamorament. Invezit al è pussibil viodi lis conseguencis: il fantat nol studie, al è dispès distrat, i rapuarts cui gjenitôrs a deventin di insoference… Dutis provis di inamorament inecuivocabilis, che duncje a testemonein l’aveniment di une robe che no si pues descrivi. Dî che une robe no je storiche, nol vûl dî che no je sucedude: la storie no pues regjistrâ l’inamorament. Tal libri, jo o feveli di chel che si pues studiâ, o ben des conseguencis de nassite de religjon: la sô costruzion, apont.
Ce disial des critichis che al à vût il libri di bande dai ambients catolics? Cualchidun al dîs che il bersai al sarès Benedet XVI. Massimo Introvigne, su “Avvenire” al dîs che lui si basarès nome sul sproc dal archeolic e storic francês Salomon Reinach (1858-1932) “mentre la fede dice “io credo” la scienza della storia delle religioni, fondata su “fatti certi”, può dire con orgoglio “io so””, come se la storie e fos la uniche in stât di dî cemût che al è nassût il cristianisim…
Che il bersai al sarès il Pape, no mi met nancje a contestâlu: assurt. Ricevi critichis nol fâs mâl, cul pat che e sedin a plomp, ven a stâi che mi contestin la part storiche. Cualchidun mi à “salvât” me e “condanât” Augias, ma no concuardi: il libri al è di plante fûr di ducj i doi. Pal rest o scuen tornâ a ripeti il concet spiegât parsore: come che al dîs Reinach, la storie e pues dîsi braurose di fondâsi su fats, il plui pussibil obietîfs. E al è un just orgoi, chel di scuvierzi e di contâ fats storics. La veretât e je une altre robe, al è un concet di cirî in ambient filosofic.
Fevelant di glesie di chenti: la glesie di Acuilee, vevie pardabon une sô origjin autonome di Rome?
O vin plusoris indicazions che il cristianisim a Aquilee al sarès di derivazion Africane o de Asie minôr. Jenfri i siei rîts, o cjatìn la lavande dai pîts che e derive de Anatolie (cumò Turchie, ndr) o la benedizion de aghe di divignince Alessandrine (di Alessandrie di Egjit, ndr). Dut chest al rivà vie aghe, midiant di marinârs e di comerciants, stant che Aquilee e je stade un dai plui grancj puarts par secui. Magari cussì no, no cate i studis di Biasutti, Pressacco e Jacumin – straordenari il so studi interpretatîf dai mosaics de basiliche – al è tant inmò di discuvierzi.
Glesie furlane
Cheste robe che esistarès une glesie “romane” principâl rispiet a chês altris al è un concet di plante fûr tridentin. Prime, dutis lis varis glesiis cristianis a erin compagnis e ancje cumò a laressin consideradis cussì, daûr dal ultin Concili.

Vignint ai nestris dîs, pre Checo e pre Beline volevino jessi i Lutero dal Friûl? Glesie Furlane aspirie a creâ une sorte di religjon protestant furlane, separade di Rome?
Par cont dal “protestantisim” di pre Checo e di pre Toni la acuse e je ridicule: no esistin nancje plui motîfs di separazion jenfri catolics e protestants. Aromai i cantins di difarence a son ducj colâts. Cheste robe che esistarès une glesie “romane” principâl rispiet a chês altris al è un concet di plante fûr tridentin (che al diven dal concili di Trent 1545-1563, ndr). Prime, dutis lis varis glesiis cristianis a erin compagnis e ancje cumò a laressin consideradis cussì, daûr dal ultin Concili. Glesie Furlane e je une associazion di predis e di laics che e opare tal plen spirt dal ultin Concili Vatican II: e je la glesie – in câs – che e sta tradint chel Concili. La fortune di Glesie Furlane e je che i siei membris a son predis e no teolics, se no a saressin stâts metûts a tasê.
Rapuarts jenfri religjons in dì di vuê: in passât sono stadis vicinancis di religjon come che si pues vê cumò in Italie pe presince di tancj imigrâts, cun moscheis dongje di glesiis? Cemût jerino gjestidis?
La uniche convivence stabile che mi ven iniment si è realizade in Turchie cul imperi Otoman: cuntun islam prevalent, ma une tolerance garantide dal stât. Turcs, Armens, Arabics, Grêcs, Ebreus: si diseve che a jerin i cinc dêts dal sultan; i cinc ambients nazionâi che su chei al jere fat sù l’ecuilibri sorenazionâl e intereligjôs dal Imperi de Miezelune. Di fat, la Europe e je simpri stade plui intolerante. Po dopo, clâr, o vin câs virtuôs intun contest intolerant, e intolerancis jenfri un ambient plurâl.
Dree Venier

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +