AI 32 DI MAI. Cemût che si compre un vendidôr

Tu puedis ancje jessi furlan, ma cualchi volte la voie di lavorâ no baste: bisugne ancje cjatâ cualchidun che tal dei, il lavôr, e in timps come chescj nol è tant facil come che al samee. “E je la crisi”, a disin, e il furlan nol capìs, e no parcè che il furlan nol ledi daûr aes notiziis dal mont, ma parcè che lui no si lasse meti in crisi di nuie.
Ma cualchidun che al ufrìs lavôr, ancje in timps come chescj, al è. Lavôrs di vendidôrs, soredut. Cumò che lis aziendis no faturin avonde, a cirin cualchidun che ur fasi faturâ di plui.
Il lavôr di vendidôr nol è il sium di nissun, tant di mancul par un furlan. Il furlan al è usât a fâ e no contâ, figurìnsi ce che al salte fûr se i tocje contâ e vonde, cence fâ nuie.
E alore lis aziendis a metin lis ofiertis sul gjornâl fasint fente che a sedin par alc altri, e al è divertent viodi lis mil manieris che si doprin par no doprâ la peraule “vendidôr” (divertent se no tu sês daûr a cirî lavôr, naturalmentri, se no al è pôc ce ridi):
MARKETING. Il 70% dai anuncis di lavôr al scomence cussì. Il marketing e je dute une altre robe, clâr, però probabilmentri chei che a scrivin lis ofiertis a resonin che “marketing” al derive di “market”, marcjât, e al marcjât si va par vendi, duncje alc al jentre. E dopo, la peraule “marketing” e je une vore di mode, no?
SALES MANAGER. “Sales” al vûl disi simpri “vendite”, ma vûstu meti podê dî “O soi un manager”?
PROMOTÔR. Simpri la stesse robe, ma al samee alc di miôr. Si cjate ancje cul tiermin inglês “promoter”, che al par plui bulo. Une volte o ai let une ofierte par une “promoter feminîl”, cun insom, però, la scrite legâl “la ofierte si intint indreçade a candidâts di ducj i doi i ses”. Cuissà se i oms a vevin di presentâsi al colocui in cotule.
SALES ENGINEER. La uniche robe che e sarès di “ingegnâ”, naturalmentri, e je il mût di rivâ a vendi. Ma se invezit di “o soi un vendidôr” tu disis “o soi un sales engineer” tu sameis un che al à studiât. Cun di plui, al è un non che al tire dongje ben i furlans, che a son ducj un pôc inzegnîrs.
Ma il plui biel che o ai let ator tai sîts internet di ofiertis di lavôr al è un altri: SALES PROTAGONIST. Tradusint: aromai tu as capît che no tu puedis deventâ un grant de television, de musiche o de leterature, o deventâ impuartant te sience e te tecnologjie. Impare a vendi ben. Almancul tu sarâs il protagonist de tô buste paie.
BETE DI SPERE