Provis gjenerâls di tragjedie
Il gjenocidi culturâl realizât dal Fassisim

Adunadis, marcis e bandierutis par ogni paîs de Furlanie, cun tant di divise, trombetis, fanfaris e tambûrs. Provis gjenerâls pe grande tragjedie che si sarès celebrade ae fin di chel altri deceni. Vincj agns par preparâ une gjenerazion di pipinots cence altre memorie che no sedi chê inventade de machine mitologjiche fassiste.
TALIANIZAZION ROMANE_ E si tache adore chi di nô, massime in Valcjanâl e tes valadis dal Nadison, o tal Gurizan, là che bielzà dal ’20 si brusin libruts di preieris, gjornâi, lunaris che no sedin scrits par talian, cjasis di associazions culturâls, politichis o identitariis no in linie cu lis gnovis diretivis di Rome. Par fuarce: o sin tiere di frontiere, imbastardide di todescjarie, sclavanie, furlanie, duncje intate di evangjelizâ al gnûf verp de romanitât, che al tache a soflâ stiçant fûcs un pôc pardut. Tai piçui paîs, vie pe plane o su pes monts, a vegnin mandâts mestris talians bielzà tal 1919. Par sledrosâ chê culture che no veve paragon cu la milenarie civiltât latine. Ecezion fate pe Filologjiche furlane, si intint, che invezit e à prosperât. Misteris! Cussì, ogni bachetade che e crevave i deduts di manutis masse furlanis e varès impastanade la gnervidure di un gnove identitât nazionâl. Ma nol bastave meti une mestre venite in classe, un impiegât calabrês in pueste, un carabinîr sicilian pe strade par obleâ ducj a fevelâ par talian. E cussì ti àn inventade la comunicazion di masse, robe di “minculpop”, ven a stâi il ministeri pe culture popolâr, che al à doprât il cine, la radio, il sport e la scuele tant che une vuate par cjapâ cetancj uciei. Cjataiso cualchi riferiment ae ete presint? Ai 20 di Setembar dal 1922, pôc plui di un mês prime de “marce su Rome”, il Duce Benito Mussolini in persone al à sielzût nuie di mancul che Udin par fevelâ da “L’azione e la dottrina fascista dinnanzi alle necessità storiche della Nazione”.
LA NESTRE TIERE INVELENADE_ Il Friûl tant che tribune privilegjade par screâ dute la naine dal repertori: le glorie di Rome imperiâl, il valôr de dissipline, la bielece de violence, il gnûf rûl de masse, la gnove linie de politiche foreste, il rispiet sacrâl pe monarchie, la necessitât di fâ fûr la democrazie. E jù la place a zigâ e a bati lis mans. Un velen che si è pandût pôc a la volte, diventant cetant rabiôs e fuart: e tal 1923 par dut il Friûl a cjapin fûc stalis, ostariis, latariis, e ancje cualchi canoniche di predi, catolic, si capìs, ma evidentementri no avonde roman, stant che si ostinave a predicjâ par furlan o par slâf o par todesc. Insume, là che si sintive puce di disubidience, di oposizion, di dissidence a rivavin lis scuadris a dreçâ lis cussiencis. No tu âs la tessare dal Partît Nazionâl Fassist? Se tu sês un statâl tu pierdis il puest. E cetancj furlans, cidins, in chei agns, a àn scugnût cambiâ mistîr, lassant libar il puest a di une schirie di oportuniscj che a vignivin di dute Italie, viodude la propetive di un bon puest di lavôr garantît. E cussì il Fas in Friûl intun colp si deliberave dai dissidents e al disnazionalizave il teritori.
FASSISIM CONTESTÂT A BUIE_ Ma cualchidun nol rive a gloti dute cheste porcarie. La date e je chê dal IV di Novembar dal 1925, “anno terzo della rivoluzione fascista”: tal aniversari de ricorence de vitorie de Italie te Grande Vuere, plombe di retoriche; tal an dal maçalizi di Giacomo Matteotti e de scree des “Leggi Fascistissime”. No le àn migo sielte a câs, chê date! Un grup di Buiês al organize il prin atentât cuintri la vite dal Duce: Ferruccio Nicoloso, resonîr, Luigi e Angelo Calligaro, fornasîrs, Ugo Riva, industriâl, Angelo Ursella, impiegât. Ducj condanâts, cui a 30 agns, cui a cuatri mês di preson, daûr dal coinvolziment te azion. Un riviel morâl che al anticipe di cuasi vincj agns la Resistence. Ma no si lu conte tai libris di scuele. E cussì un altri buiês, Giovanni Gherbezza pe anagrafe, Zuan Vergjarie par ducj chei altris. Un grant mataran. Une dì al passe sot dal palc di une adunance fassiste a Buie. Si fâs strade jenfri la int, si plante devant dal Podestât che al pontifiche tirât a lustri e al salude a la romane, berlant: «Eja Eja a Cagâ!» Nol veve pôre di nissun. Al jere alt, sec e fuart come un rôl. Te sachete al tignive simpri un façolet di tabac cun dentri un clapat. «Che si provin a vignî a cjolimi. Cun chest ti copi cualsisei nemâl». Depuartât in Gjermanie ai lavôrs sfuarçâts, si divertive a smicjâ cu lis patatis i cuadris di Mussolini e di Hitler, “chei doi macacos”, al diseve. E nancje di lui un “et” tai libris di scuele.
Il deceni dal “mestrut di Predappio”
Dîs agns di cove dal mâl, tal cuacj de pôre e de ignorance di une Italie cjastrone e ubidiente. La cove di un Regjim totalitari, violent, nazionalist, che al varès insegnât e ce tant, e ce tant ben, a ducj chei altris ditatôrs de storie di dopo, dûrs o mulisits che a sedin stâts, cu la pice di striçâ ogni libertât individuâl e coletive, imolade sul altâr di une Patrie imponude a colps di retoriche, demagogjie e baston. L’om de Providence, il mestrut di Predappio, si sarès imponût cu la benedizion di une cierte Glesie romane, simpri pronte a pleâ i zenoi cun chei che i prometin golosets clericâi, e il silenzi, nancje tant imberdeât, di chê sdrume grise che no si impace mai, che e à miôr di no pensâ, che e dîs che no son fats siei, baste dome no vê fastidis di sorte. In chei agns alì o vin imparât che se talians no si nas, talians si scuen deventâ, cu la buine o cu la triste, che tu setis furlan o slâf o todesc nol impuarte: tus âs di dismenteâ, di cambiâ cognon, di disimparâ la tô “Matrie”, la identitât che tu âs supade cul lat di tô mari, e di jessi pront a murî pe tô (gnove) Patrie, ven a stâi chê di un Pari Paron autoritari cun tant di gramule fuarte! E in clime di ricorencis, di bandieris e di nostalgjiis risorzimentâls, chest al varès di sei un carûl libar di masanâ dentri tal çurviel di ognidun di nô. Par fortune che tra tancj dordei cjapâts tal visc de convenience, de pôre o de debolece, cualchi acuile chi in Friûl e à vût miôr di svolâ libare e altissime, freantsi des sclopetadis dai cjaçadôrs in divise brunide. (A.F.)
Angelo Floramo
LA INTERVISTE - / Toni Capuozzo: «Ognidun al bale cun sô agne»
Oscar Puntel
Nus à lassâts Toni Capuozzo, il grant gjornalist. A son za ce tancj i ricuarts che si viodin ator su di lui, parcé che al jere un om ce tant stimât e amât. Al jere un amì de La Patrie dal Friûl, e al à vût scrit ancje par nô. Sì, par furlan. Parcé che […] lei di plui +
Zovins di gale / Sborf, il zûc par induvinâ e imparâ peraulis par furlan che al à za concuistât miârs di personis
Erika Adami
Daûr un grup zovin che al à a cûr la lenghe furlane Un sborf di un biel colôr vert slusint al è il simpatic compagn di zûc par cui che al à voie di induvinâ e imparâ peraulis in lenghe furlane sul propri dispositîf digjitâl. Chest de fin di Març, cuant al è rivât Sborf […] lei di plui +
Galerie fotografiche / Cuinte edizion di “Stin dongje ae patrie”
Redazion
Pe rassegne Avostanis, Domenie ai 4 di Otubar li dai Colonos si è tignude la cuinte edizion di “Stin dongje ae Patrie“. La storiche riviste furlane e a fât fieste par i siei otante agns e e a cjalât al avignî adun cul mont de culture, de musiche, dal associazionisim, dal sport tal ricuart no […] lei di plui +
Stin dongje ae Patrie / La storiche riviste furlane e fâs fieste par i siei otante agns
Redazion
Pe rassegne Avostanis, Domenie ai 4 di Otubar aes 3 dopomisdì li dai Colonos a Vilecjaze di Listize tierce edizion di Stin dongje ae Patrie. La storiche riviste furlane e fâs fieste par i siei otante agns e e cjale al avignî adun cul mont de culture, de musiche, dal associazionisim, dal sport tal ricuart […] lei di plui +
La piçade / Salts, lavoradôrs e… laris. Almancul i laris a fevelin par furlan
Mastiefumate
Che il rapuart tra il Messaggero Veneto e la lenghe furlane nol fos dai miôr, si saveve. Par esempli su la partide dal secul tra la nazionâl furlane e chê groenlandese, nancje une rie par furlan. Si spietavin che al vignìs ripuartât a caratars cubitâi il sproc tal strisson puartât in cjamp dai zuiadôrs intant […] lei di plui +
Gnovis pai fruts / I Gnognosaurs a imparin a svolâ: al rive in edicule «Tal blu piturât di blu», il gnûf album di colorâ
Redazion
Daspò dal sucès dal prin album vignût fûr a Nadâl, i simpatics dinosauruts che a fevelin par furlan a proponin pal Istât une gnove aventure: il professôr Einsaur e il so fedêl assistent Blik a provin di svolâ, ispirâts dai pterodatils. Rivarano? ◆ A partî de fin di Jugn al è rivât tes ediculis dal […] lei di plui +



