TERITORIS – INTERNAZIONÂL. L’Udin, plui che une scuadre

L’Udin, la nestre scuadre di balon, si conferme ambassadôr di furlanetât. Di fat la Provincie di Trent in ocasion de zornade de lenghe mari, che e je colade ai 21 di Fevrâr passât, e à invidât il president de societât Franco Soldati a fevelâ di chest lôr impegn.
Vie pe cunvigne “Sportamen”, l’intervent di Soldati si intitulave «La lenghe dal lûc pe scuadre dal cûr» che al voleve puartâ l’esempli dal rapuart che la societât di balon e à cjapât sù par tignî dongje il mont dal balon e il teritori, tal non de identitât.
Come che nus conferme Marco Poltrich dal servizi pes minorancis linguistichis de Provincie di Trent (www.minoranzelinguistiche.provincia.tn.it), la presince e je stade une vore preseade dal public e no dome. «O vin volût invidâ il President Soldati parcè che o vin preseât une vore lis sieltis che al à fat l’Udin tai ultins timps» al comente Poltrich «Viodi che une scuadre di Serie A e ten il so sît Internet (www.udinese.it) ancje par furlan al è un esempli fuart che le met sul stes plan di impuartantis societâts europeanis, come il Barcelone FC».
La atenzion pal binomi sport e identitât in Friûl e je rivade a la Provincie di Trent ancje midiant dal volum “GOL, la lenghe dal sport”, la ricercje di Federica Angeli e Priscilla De Agostini che al è stât presentât vie pe cunvigne.
«Vê i ospits dal Friûl al à fat plasê a noaltris, ma ancje ai tancj zovins che a son restâts a scoltâ dute la cunvigne» al continue Poltrich «parcè che ancje noaltris o sin convints che la esperience furlane e sedi une vore positive e che e pues zovâ une vore a la promozion di chescj valôrs».
Soldati al à ricuardât tal so intervent il rapuart cu la Agjenzie regjonâl pe lenghe furlane e ancje lis reazions positivis dai zuiadôrs, in particolâr Gökhan Inler che al fevele un tic par furlan.
«O sieri parafrasant il sproc dai blaugrana catalans “Més que un club”, parcè che come il Barça pe Catalogne» al à dit Franco Soldati« ancje l’Udin pal Friûl al è “Plui che une scuadre”».
Christian Romanini