SPECIÂL. Il vint ocitan che al à fat il zîr di Italie

Argoments di mode come lis dificoltâts di dâ acet e la diviersitât, a son tratâts in maniere particolâr dal film prodot tal 2005 “Il vento fa il suo giro”, diret dal regjist bolognês Giorgio Diritti che si è formât lavorant cun Pupi Avati, Fellini e Olmi. Il film al à diviersis particolaritâts: i atôrs a son ducj, fûr che Thierry Toscan e Alessandra Agosti, no professioniscj; cun di plui, il film al è stât realizât cence contribûts statâi, cuntune formule produtive particolâr: lis personis de troupe e i atôrs a son jentrâts in coproduzion comprant cul lôr lavôr une cuote dal film.
LIS LENGHIS_ Soredut, al è il prin film chel al dopre, dongje dal talian e dal francês, l’ocitan, lenghe dal grup gallo-romancio za nomenade di Dante come lenghe poetiche di ecelence, restade inalterade intai secui e fevelade in tredis valadis alpinis dal Piemont, tal Midi da France, intune valade da Spagne e inte enclave calabrese di Guardia Piemontese.
LA STORIE_ Il titul in ocitan, “E l’aura fai son vir”, al fâs riferiment al moviment circolâr dal aiar, come simbul des robis che prin o dopo a tornin.
La storie e fevele di un pastôr francês, Philip Hèraud che si trasferìs cu la famee intun paisut de Val Maira, a Chersogno, par scomençâ une ativitât di casâr. Par un paîs che al vîf dome di turisim domenicâl o estîf, e je une pussibilitât di rinassite, ma la integrazion e risulte dificile: a nassin gjelosiis, incomprensions, invidiis e il paîs si spache. Il forest al ven refudât, e al à di lâ vie. Ma la problematiche dal acet e reste…
I PREMIS_ Patrocinât dal Ministeri dal Interni – Aree Minorancis linguistichis, il film al è stât pluripremiât tal forest: film rivelazion de 49me edizion dal London Film Festival, candidât a 5 David di Donatello, al à otignût fra i tancj premis, il Grand Prix Annency Cinèma italien e il Prix CICAE da Confederation Internationale des Cinemas d’Art e d’Essai al 24m Festival d’Annency Cinèma Italien, il Prin Premi Rosa Camuna d’Oro al 24m Bergamo film festival, il Prin Premi al Lisbon Village Festival e il Premi SIAE de Prime Fieste dal Cine di Rome. La distribuzion intes salis cinematografichis e je stade limitade, ma al è stât preseât sedi de critiche che dal public che al cîr sintiments al cine: parcè che, di volte in volte, si pues dâ o ricevi acet.
Mara Piccoli