I CLASSICS – 14. SANT JACUM, LÀ CHE AL FINÌS IL MONT

Une citât metude suntune mont no pues restâ platade
Naturalmentri la Madone e opere midiant dai oms. E i benedetins di Monserrat a àn rivât a jessi fedêi a Diu e al popul, che e je la uniche maniere di jessi fedêi. A àn incjarnade la fedete lenghe e te culture dal popul, paiant di persone cun persecuzions e martars, soredut intant de vuere civîl e de ditature di Franco. Ma l’amôr pe lôr int al jere plui fuart de pôre e dal ricat. Dut al incontrari di nô, che sot de ditature di Mussolini, amì di Franco, o vevin un dai vescui plui fassiscj di Italie che, impen di metisi cuintri de ditature par difindi lis resons legjitimis dai predis slovens e furlans e de int, si è metût cuintri de int, difindint lis resons indifindibilis dal regjim. Tal so coragjo di leon, al scriveve che no jerin timps di cuistionâ, ma di ubidî e che i cristians no jerin seconts a nissun tal dâ il lôr sanc pai ideâi di fede e di patriotisim dai jerarchis.
Cuant che al è rivât il Concei, che al à permetût di doprâ lis lenghis “volgârs”, i vescui e i predis catalans a àn capît a colp che “volgâr” al voleve dî catalan e no spagnûl. I nestris luminârs invezit a àn capît che “volgâr” al voleve dî dome talian. Cussì il midiesim Concei, che pai catalans al è stât une provedence, par nô al è stât un imbroi e une disgracie, parcè che nus à gjavade la ultime e uniche pussibilitât di esisti almancul in glesie.
Ma sino propit tant disgraciâts di vê simpri dafâ cun cierte int?
La vision dal complès religjôs e culturâl di Monserrat mi à fat vignî tal cjâf une altre pagjine de Bibie, une vore consolant. E je in Matieu, là che Jesù al fevele dal sâl e de lûs e al dîs:”Une citât metude suntune mont no pues restâ platade” (5, 14).
Monserrat e je un lûc salvadi, discomut, fûr di ogni trafic e corîr di int, che bisugne lâ propit li par viodilu. E pûr la sô lûs le àn viodude di lontan, par dute la Catalogne e ancje plui in là, e dutis lis gjenerazions, di cuant che, dal 1025, Oliba, abât di Ripoll e vescul di Vic, al à fondât il munistîr sul lûc dal romitori di Sante Marie, a àn alçât i voi e il cûr viers di cheste lûs spirtuâl e culturâl, stele autentiche che ur segnave la strade ancje in cheste vite.
A proposit di romitori, che si lu cjate ancje te tradizion di Sant Jacum di Galizie, mi ven tal cjâf cualchi fondadôr nostran che, impen di ritirâsi su la mont a preâ, disponût magari a murî in solitudin come Charles de Foucauld, si ustine a fâ sù sperant che, cul fâ sù, la int e ledi sù. Ma la int no ven par vie dai mûrs; e ven par vie de lûs, come che e conferme la storie di ducj i lûcs sants.
Se la int e à simpri corût a Monserrat, al vûl dî che la lûs di Monserrat e jere fuarte, plui fuarte dal scûr spirtuâl e morâl e culturâl che al regnave abàs. Se no sintivin cheste lûs, no vignivin. Duncje la glesie e à di jessi luminose e in alt, se e à voie che la int e cjamini viers de lûs. Parcè che la int e à une dibisugne fisiche de lûs; le van cirint pardut, magari par stradis sbaliâdis. No pues vivi cence lûs, cence un orientament, cence un pont di riferiment, cence une sperance, cence un alc che al dedi sens e valôr al so scombati. Se la int furlane no cor di nô, come che no cor in nissune glesie taliane, al è parcè che no fasìn lûs. O feveli di chê lûs profonde che ti jentre te anime, ti sostente e ti console. Se il timp che o vin spindût par fâ sù struturis e par traficâ lu vessin doprât par deventâ luminôs, ce grant regâl pe int e ce gracie par nô! Invezit o continuìn a fâ fiestis e fiestutis par tirâ dongje fruts, zovins, vedrans, veduis e vie. Come chei des gjostris. Ma la int no cîr gjostris, che e je za simpri su la gjostre; e cîr alc di plui.
La storie di Monserrat e je un spieli par ogni glesie e par ogni timp. Se la glesie e devente une lûs di culture, di sapience, di essenzialitât, di relativitât, di santitât, a partiran denant dì par no pierdi nancje la prime spere, come lis rosis che si voltin de bande dal soreli par cjapâlu dut. Se si à voie di fâ un bon investiment, si à di investî in religjon e culture. Vuê plui di îr.
pre Antoni Beline