ATUALITÂT – Giorgio Ferigo: miedi, scritôr, storic, musicist, om di grande culture

Al non di Giorgio Ferigo si podin meti dongje diviersis peraulis: miedi, scritôr, storic, poete, musicist, om di grandis viodudis e di grande culture. Ancje se ai prins di Novembar a son stâts za trê agns che nus à lassâts (ai 5 di Novembar dal 2007), lui al è inmò vîf grazie ae associazion culturâl a lui dedicade. Cheste associazion, si lei intal statût, e je nassude par meti adun, ordenâ, conservâ e promovi dut il materiâl di Zorç, in ducj i cjamps che al à lavorât mantignint a strent il leam cul teritori cjargnel, in particolâr cul Comun di Comelians. Une associazion ative che e à un grum di progjets di puartâ indevant, tra chescj e je la presentazion dal prin volum dai scrits za editâts di Zorç (previodude pai 9 di Dicembar a Udin e prime de fin dal an ancje a Comelians) e po dopo la sistemazion dal so archivi che atualmentri al è inte cjase dal Botêr a Comelians. A chest proposit a stan tirant dongje dut il materiâl che al è inmò ator: cui che al è interessât al pues cjapâ contat cu la associazion midiant dal sît internet www.giorgioferigo.net.  (M. Vezzi.)